Lunglei thlang lam maxicab tlân ṭan; Leimin vangin an tlân tluang thei rih lo

Lunglei aṭanga khawthlang lam panna kawngpui, NH-302 chhe lutuk vangin maxicab-te hun eng emaw chen an tlan duh loh hnuah nimin aṭang khan an tlân ṭan a, mahse, leimin avangin dan pangngaiin an tlân thei lo.

Tarlan tawh angin, Lunglei thlang lam panna kawngpui chhe lutuk avangin maxicab-te chu July 24, 2023 aṭang khan an tlân duh lo a, an tlân loh chhungin kawngpui chhe zual lai thawm ni mahse awmzia a neih loh avangin August 4 & 5 khan Lunglei DC thupek angin, kawngpui khârin kawng thawm ṭhat hna thawh leh a ni.

Lungsen aṭanga thu dawn danin, kawng chhe zual laite thawm a nih hnuah nimin aṭang khan maxicab-te chu an tlân ṭan a, mahse, kawngpui hnawh ping khawp leimin a awm nual avangin an tum hmun thleng an tlan thei rih lo.

Tlabung aṭanga thu dawn danin, Lunglei-Tlabung kawngpui, NH-302 chu ruahsur avangin hriat theih chinah hmun pali-ah lian tham taka kawng chhaka lei minin a hnawh ping mek a; Pathianni zan pawh khan lirthei ṭhenkhat chu zankhuain an táng a ni.