Hmawngbuchhuah thlenga rél kawng siam tumna sorkar laipuiin a pawm

Mizoram chhim tàwp, Hmawngbuchhuah thlenga rél kawng (railway line) thar siamna tura ruahmanna sorkar laipuiin a pawm a, hei hi lawmawm a tih thu Governor Dr Hari Babu Kambhampati chuan Twitter kaltlangin a tarlang.

Governor chuan, Mizorama rêl kawng thar siamna tura ruahmanna sorkar laipuiin a pawm chu Mizoram hmasawnna atana thutlukna pawimawh tak a nih thu a tarlang a, Mizoram mipui aiawhin lawmthu a sawi a ni.

Sorkar thuchhuah tarlan danin, Mizorama rél kawng thar siamna tur enfiahna (survey) ang chuan, Sairang aṭangin Mizoram chhim lam ramri, Myanmar depa awm Hmawng­buchhuah thlengin rél kawng siam tum a ni a; hemi chungchang hi North East Frontiers Railways DGM office thuchhuah siamin a tarlang.

NEFR DGM Office tarlan danin, Act East Policy kalpui mek a nih angin Indian Railways chuan Mizoramah Myanmar ramri chu rél hmanga thlun zawm a tum a, tun hnai khan Railway Board chuan Myanmar ramri bul, Mizoram chhunga km. 223, Sairang (Aizawl) aṭanga Hmawngbuchhuah thlenga final location survey neih tawh chu a pawm. Aizawl (Sairang) - Hmawngbuchhuah rél kawngah hian rél chawlhhmun (station) 12 awm tura ruahman a ni.

Mizoram awmna chu India ram tana hmun pawimawh (strategic importance) a nih avang leh sumdawnna huang zauhna atan hmun remchang a nih dante ngaihtuahin Ministry of Railways chuan Sairang-Hmawngbuchhuah railway project kalpui a rêl a; India hmarchhak lam kalpawhna kawngpui pawimawh tak a hawng dawn a ni.

Myanmar ram chhunga Sittwe lawng chawlhhmun chu tun hnai khan Ports, Shipping and Waterways minister Sarbananda Sonowal chuan a hawng tawh a; rel kawng hi siam puitlin a nih chuan Myanmar ram chhunga Sittwe lawng chawlhhmun kaltlanga India hmarchhaka bungraw phurh luh man a hniam dawn bakah, bungraw phurh hun chhung nasa takin a titawi dawn a ni.

NEFR chuan Bairabi-Sairang inkarah km. 51.38-a thui rel kawng lian an siam mek a; Manipur-a Myanmar ramri Moreh pawh turin km. 111-a thui rel kawng siam tum a ni bawk.