MNYF-in Rajya Sabha MP an chhan

MNYF chuan thuchhuah siamin, Parliament-a pawm tâk Forest Conservation (Amendment) Bill, 2023 chu Rajya Sabha MP K Vanlalvena'n a duh loh avanga Bill pawmpuitu nih a duh loh avangin rorelna-in a chhuahsan niin an tarlang.

MNF ṭhalaite chuan, August 5, 2023 khan ZPM Ṭhalaiin Forest Conservation (Amendment) Bill, 2023 sawihonaah MP K Vanlalvena chu vote thlâk ngam lo leh bill duh lohna lantir duh loa tlânchhiaah an puh thu an sawi a; a hma pawhin ZPM worker-te'n social media-ah K Vanlalvena chu Manipur chungchanga Parliament-a suspension of business notice thehlut lo, mahni thutiama ding lo tiin an lo bei tawh bawk niin an sawi.

ZPM Ṭhalai thuchhuah chu pawi an tih thu sawiin MNYF chuan, "He Bill sawiho a nih hma hian Chairman-in Manipur chungchang sawi a remtih loh avangin opposition MP-te'n House an chhuahsan vek tawh. Bill hi tlang ngei tur a ni tawh a, Pu K Vanlalvena chuan forest thuneihna chhuh ṭhensakna tur bill pass puitu nih a duh loh avangin House a chhuahsan ve leh a. Bill a thlàwp loh thu leh a thlàwp loh chhante tarlangin thuchhuah a siam tawh a ni," an ti.

MNYF chuan, Manipur-a Mizote laka Meitei-te'n tharum an thawh chungchang sawihona atan House rorel kal pangngai tihtawp dilna chu Rule 267 hmangin K Vanlalvena'n nimin khan a thehlut leh niin an tarlang bawk.