KHAWTHLIR

Thenkhat hlawh pe

Mizoram sorkara a nghet loa thawk (provisional employee leh workcharge)-te July 2023 thla hlawh tur chu nimin khan Mizoram sorkarin a pe chhuak. Sorkar hnathawk nghette leh pension tawhte July thla hlawh tur erawh pek chhuah a la ni lo a, pek hun tur hriat a ni lo.

Ran vulh nghaisa

Chawilung All NGO chuan thuchhuah siamin, August 6, Pathianni chhun inkhawm hlan khan YMA president Lalparmawia huana ran vulhte nghaisak a ni tih an tarlang. Chawilung NGO-te chuan, pawi khawihtute a rang thei ang bera chhui chhuak tur leh hrem an nih ngei theihna atana hma la turin police an ngen.

Ambulance pe

Minister Lalchhandama Ralte chuan nimin khan a bial chhunga Ratu damdawi-in (Primary Health Centre) hnenah ambulance pakhat a pe. Ambulance hlanna inkhawm hi Minister chenna in, Durtlang Leitanah neih a ni a, Ratu Village Council president Lalhmingthanga hnenah a hlan a ni.

Bâwng hri léng

Animal Husbandry & Veterinary department chuan Aizawl district-a Sihphir-Venghlun, Durtlang-Zuangtui kawng GCS Road leh Lengpui-Mosia Farm-te chu bâwng natna, Lumpy Skin Disease lênna hmunah an puang.

IMI 5.0 hawng

Mamit additional DC V Laldinsanga chuan nimin khan Mamit Chief Medical Officer pisaah naupang kum 5 hnuai lam leh nu nau pâite hnena hri danna pek beihpui thlakna, Intensified Mission Indradhanush (IMI) 5.0 a hawng. IMI 5.0 thawh khatna hi August 7-11, 2023 chhungin Mamit district-a Damdiai, Phaizau, Mualṭhuam, Rajiv Nagar, Tuipuibari, Silsury, Hnahva, Dilzawl, Kanhmun leh Begabekia khuaahte kalpui tum a ni.

Tanpuina hlân

Mission Veng Kohhran Hmeichhia chuan Manipur-a Zo hnahthlakte ṭanpui nan nimin khan Central YMA-ah Rs 50,000 an thawh. Ṭanpuina sum hi R Zokhumi'n CYMA president R Lalngheta hnenah a hlân a ni.