Sports directorate building thar hawng

Sports & Youth Services (SYS) directo­rate building thar, New Capital Complex-a mi chu nimin khan SYS minister Robert Romawia Royte-in a hawng.

Robert Romawia Royte chuan infiamna lama sorkar hmalakna sawiin, "Kum khat chauh sorkarna kan siam hnuah sport-ah nasa takin hmalak a ni. Football field 13-a phûl lem phahna tur sanction tihfel a ni tawh a, badminton court paruk lenna tur standard hall lian pakhat leh hockey astro turf ground pakhat siamna tur sanction tihfel a ni tawh bawk," a ti a; Mizoram Sports Policy peih a nih tawh thu a sawi.

Sports Minister chuan, Sports directorate building ṭha tak luah a ni ta chu lawmawm a tih thu sawiin, thawktute phûrna thar a pek a beisei thu a sawi a; infiamna lam tihhmasawn nan foreign funding lian tham hmuh a beiseiawm

ṭan nia sawiin, "Sorkar laipui sum bakah, ram páwn lam aṭanga sum hai luh a nih theih nan central ministry hrang hrang leh foreign funding agency dangahte hmasawnna tur project siam zung zung a pawimawh," a ti.

Robert Romawia sawi danin, MNF-in sorkarna an siam hnuah sorkar chuan football field 13 leh hockey field pakhata phullem phahna tur tihfel a ni tawh. Sports directorate building thar hi cheng nuai 1040.42 senga sak niin, North East Council aṭangin hmuh a ni a, Lushai Engineers-in December 2016-ah an sa ṭan a ni. In hawnna inkhawm chu SYS director Zothanmawia’n a kaihruai a, Mizoram State Sports Council secretary C Laltlanthanga’n technical report a sawi. Inkhawmah hian MLA H Biakzaua pawh a tel a ni.