BJP tuamhlawma thawhpuiah Congress party puh; MNF-in BJP thawhpuina titawp an tum lo - ZPM Ṭhalai

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kawm a; Congress party chu Mizorama BJP chhiat ber lai pawha lo tuamhlawmtu leh lo thawhpui duhtu an nih thu leh MNF-in BJP an thawhpuina tihtawp tumna an la nei lo tih an sawi.

ZPM Ṭhalai vice president Lalṭanpuia Zote chuan, Mizorama BJP la thawhpui lo awm chhun party chu ZPM party chiah a nih thu a sawi a, "Pathian khawngaihna avanga ZPM party boruak lian zel leh ZPM party ṭhang duang lutuk chu party dangin hmeh mih ngaihna an hriat loh avangin tun hnaiah ZPM chu nasa takin an bei a, chu'ng an beihna hrang hrangte chuan awmzia a neih loh zel avangin a tawpah phei chuan rem leh rem loin BJP leh ZPM min sawi zawm an tum nasa hle," a ti a, hetianga inpuhna hi ram hlui politics ze dik takah an ngaih thu a sawi.

August 4, 2023 khan MPCC vice president Lal Thanzara'n Congress Bhavan-ah ZPM leader Lalduhoma chu BJP do ngam loah a puh thu leh August 1, 2023 khan MPYCC president Laltawnliana'n Sesawnga street campaign an neihnaah ZPM chu BJP thawhpui châkah a puh thu sawiin Lalṭanpuia chuan, "Mizorama Congress a sorkar lai - April 20, 2018 khan CADC inthlanah Congress party chuan BJP nen thawkdunin sorkarna an siam dun. Mizoramah Congress party hi BJP a chhiat ber lai pawha lo tuam hlawmtu leh lo thawhpui duhtu an ni tih hi a lang chiang hle," a ti.

Lalṭanpuia chuan Congress party chu dawt hmanga party dang beia din chhuah leh tum lo a, kum 20 chuang sorkarna an chelh tawh chhunga Mizoram mipui intodelhna tura an thawh dante, sorkar term liamtaa zu zawrh an kalpui chu Mizoram mipuiin an ṭhatpui dan leh an hmachhawpte sawi zawk tura an duh thu a sawi.

ZPM Ṭhalai Vice President chuan, MNF-in BJP a thawhpuina tihtawp zai a la rel lo tih sawiin, "Kan MP pahnihte pawh Parliament-ah BJP karah vawiin thlengin an la ṭhu a, BJP dodalna reng reng chhâk chhuak ngam loin vawiin thlengin an la awm," a ti a; BJP leh an sangawi zawnpuite inkhawmpuiah pawh Lok Sabha MP C Lalrosanga a kal ve thu a sawi.

BJP leh ZPM sawi zawm tum tlattu party-te chu Mizorama sorkar ṭha din theih dan tur aia lalna leh thuneihna ringawt âtchilhtute an nih thu ZPM Ṭhalai hruaitute chuan an sawi a, "An thusawite ngaihthlak dan tâwk leh an mahni hrim hrim en dan tâwk lo thiam turin ZPM Ṭhalai chuan Mizoram mipuite kan chah a ni," an ti bawk.