Mizo mipuite hlawhtling thama hnathawk hnama siam kan tum - MPCC Treasurer

Aizawl South-II Mahila chuan nimin khan Zawlbuk, Thakthing Vengah political training an buatsaih a, an hun hmanpuitu MPCC treasurer Dr Lalmal-sawma Nghaka chuan Mizo mipuite hlawhtling thama hnathawk hnama siam an tum thu a sawi,

Dr Lalmalsawma ṭang puihna policy chu Mizoram mipuite hi Japan, South Korea leh Singapore ram mipuite anga tih takzet leh hlawhtling thama hnathawk hnama siam tumna a nih thu sawiin, "He policy hi rinawm leh nasa taka hnathawk mekte chawikan tumna policy a ni," a ti.

MPCC Treasurer chuan ṭang puihna chu mipuite thawkho thiam tura inzirtir tumna a ni tel tih sawiin, "Society, self help group leh PACS kaltlanga awmze nei zawka kan thawhrim rah kan seng theih nana duan tel a ni," a ti a, PACS kaltlanga mipuiten an mahni inrintawkna nen an mamawh huna loan facilities an inpek tawn theihna tur thlenga ruahhmanna siam a nih thu a sawi.

Kan thalaite tan eizawnna tam tak siam hi kan ramin a mamawh hle tih sawiin Dr Lalmalsawma chuan, "Sorkar hna kan vaia thawh theih a nih loh avangin, ṭhalaite an mahni thiam thil, an tuina lamah eizawnna siam sak theihna kawng sial nan ṭang puihna' policy hi duan a ni. Kan ṭhalaiten khawvel zau zawka an thalaipuiten an hmasawnna an hmuh mek ang hi Mizoramah ngei an hmuh ve theih nana kawng sial tumna a ni bawk," a ti.