Grape wine hralh turin thawhhona ziak

Hnahlan Grape Farming & Processing Coperative Society (HGFPCS) Ltd. leh RR Sales, New Delhi chuan nimin khan Planning & Programme Implementation office-ah Mizoram pawna Hnahlan Winery siam Isabella Wine hralhna turin thawhdunna thuthlung an ziak. Thawhdunna thuthlung hi kum nga daih tura ziah niin, kum thum daih zel tura pawhsei theih a ni.

RR Sales hotute chuan, Isabella Wine chu August thla tawp hian Delhi-ah tlangzarhna (launching party) an nei dawn tih an sawi a, "Delhi-ah mite'n an hmelhriat turin kan tlangzarh anga, a feedback awm dan azirin wine quality-a siamṭhat ngai a awm chuan kan siamṭha chho zel ang," an ti.

Mizoram pawnah Mizorama kut hnathawktute thil thar chawilar a, a hralhna kawngah theihtawp chhuahpui an tum thu sawiin RR Sales hotute chuan, "Kut hnathawktute thawhpui zel kan tum a, wine bakah hian kut hnathawktute thil thar chhuahte market ṭha zawka hralh a nih theih nan hmalak kan tum zel dawn," an ti a; India ram hmun danga hralh chhuak tur leh hlawk zawka hralh a nih theih nan kut hnathawktute thar chhuah chu a tam a ngaih thu an sawi.

HGFPCS aiawh Francis Lalmalsawma Sailo chuan, RR Sales nen thawhdunna an nei tur chu an lawm thu a sawi a; wine siamna winery-te tihchangtlun tuma hma an lak mek thu a sawi bawk.

Thawhdunna thuthlung ziahnaah hian HGFPCS chairman C Vanlalhriata'n hming a ziak a, RR Sales, New Delhi aiawhin Dussiness Development director V Lalrindika'n hming a ziak thung. Mizoram State Planning Board vice chairman H Rammawi leh Champhai North bialtu MLA Dr ZR Thiamsanga-te'n an telpui.