September ral hmain SEDP sem zawh tum
SEDP Phase-II thawh khatna chu kumin September thla ral hmain sem zawh hman tum a ni a; thawh khatnaah hian chhungkaw 60,000 hnenah Rs 25,000 ṭheuh pek tum a ni.
Nimin khan SEDP Executive Board chu an chairman Tawnluia, deputy chief minister kaihhruaiin Planning committee room-ah an ṭhukhawm a, Family Oriented SEDP Phase-II kalpui dan tur an sawiho. SEDP Phase-II thawh khatna chu kumin September thla ral hmain sem zawh hman tum a nih thu leh phase-II thawh khatnaah hian chhungkaw 60,000 hnenah Rs 25,000 ṭheuh pek tum a nih thu tarlan a ni.
Sorkar thuchhuah tarlan danin, Family Oriented SEDP hi eizawnna ngelnghet leh hmasawnna siam tura chhungkaw tinzawna duan a ni a, chhungkaw eizawnna bulṭanna siam sak leh ṭanpuina pek hmangin Mizoram chhunga mimal leh chhungkua, a tam thei ang ber dimhmun ṭha zawka hlankai tum a ni. Family Oriented tih a nih angin ṭanpuina hi chhungkua anga dawn tur a ni a, chhungkaw pakhat aṭangin beneficiary pakhat chauh awm theih a ni.
Mizoram sorkar hnuaia Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism department-te hnuaiah eizawnna kalpui tur (trade item)-te thlan tur a ni a; MLA bial tin aṭanga chhungkua 1,400 thlan niin, hamṭhatna dawngtu beneficiary 56,000 an awm thei dawn a, heng baka chhungkaw 4,000 dangte chu MLA bial lian deuhah pek belh emaw, a mamawh zual chhungkuate SEDP Governing Board remtihnaa pek tur a ni.
Ṭhutkhawma tarlan danin SEDP Phase-II ah hian tun dinhmunah beneficiary 59,736 an awm mek a; Agriculture department hnuaiah 2,163, AH&Vety department hnuaiah 37,379, Commerce & Industries department hnuaiah 10,108, Fisheries department hnuaiah 816, Horticulture department hnuaiah 3,055, LRS&WC department hnuaiah 5,612, Sericulture department hnuaiah 50, Tourism department hnuaiah pakua leh UDPA department hnuaiah 544 tihfel tawh a ni. Beneficiary dang 264-te chu tunkar chhunga tihfel hman tum a ni bawk.
He hunah hian Family Oriented SEDP Phase-II kalpui tura beneficiary neih dan, sum pek chhuah dan tur leh hun bituk chhunga kalpui dan tur ruahmanna duante zirchian a nih bakah, beneficiary-te hmalak dan enzuina leh hlawhtlinna changte hmalakna phochhuah sakna (success story documentation) tih dan turte sawiho a ni. A tiṭha zualte lawmpui leh chawimawi kawnga ruahmanna neih dante pawh sawiho nghal a ni.