Leikhi vangin chhungkaw 17-in an chenna in an chhuahsan

Nimin khan Electric Veng, Lawngtlaia chhungkaw 17-te chu an chenna in awmna velah lei a khik nasat avangin hmun him lamah sawn chhuah an ni.

Lawngtlai aṭanga thu­dawn danin, lei khikna hmun hi nimin zing khan Bialtu MDC T Lalengmuana, addl. DC Abraham Beirazi Khithie leh khawtlang hruai­tute'n an enfiah hnuah, chhungkaw 17-te hi hmunhim lama sawn chhuah phawt turin thu­tlukna an siam.

Chhungkaw 17-ah hian mi 80 vel chengin, an veng YMA hall leh middle school-ahte sawn chhuah lailawk an ni. Hnatlanga thawk chhuakten an bungrua an awm lailawkna turah an dahsak a ni.

Lei khikna hmun hi NH-54 chunglam niin, kum dangah pawh fur laiin a lo khi fo tawh ṭhin a ni.