Tuilian vangin Tlabung leh Chawngteah chhungkaw 297 sawn chhuah an ni tawh

Tunhnaia ruahsur nasa avanga Khawthlangtuipui leh Tuichawng lui a len avangin chhungkaw 297 chu hmunhim lamah sawn chhuah an ni tawh.

Vanglaini thudawn danin, Khawthlangtuipui len avangin Tlabung leh a chhehvela chhungkaw 252 chu hmun him lamah sawn chhuah an ni a; sikul, Hindu leh Buddhist biak-in, bazar shed, Salvation Army quarter leh community hall-ahte awmtir an ni.

Hmun him lama sawn chhuahte hi Tlabungah chhungkaw 66, Tipperaghat-ah chhungkaw 47, Silgur khuaah chhungkaw 42, Tuichawngah chhungkaw 35, Lamthai-ah leh Nunsury I-ah chhungkaw 26 ve ve leh Sugarbasora-ah chhungkaw 11 te an ni.

Tuichawng lui lian vangin Chawngte-ah chuan chhungkaw 45 hmun him lamah sawn chhuah an ni a, sikul leh hmun remchang dangahte awmtir an ni. Chawng-teah hian temporary relief camp atan sorkar building 12 ruahman phawt a ni.