Hmathlir fel tak zarah hmasawnna duhawm tak kan hmu zel dawn - CM
Zoram Medical College (ZMC) chuan August 7, Thawhṭanni khan an academic building tharah Founding Day vawi 5-na an lawm a, chief minister Zoramthanga'n hmanpui.
Chief Minister chuan, "Hmathlir fel tak neia hmasawnna hna hi kalpui a ngai a... hmathlir fel tak zarah hmasawnna duhawm tak tak hi kan hmu zel dawn," a ti.
Zoramthanga chuan, ZMC pian dan chu a kawng a bumboh tih a sawi a, "A tirah Central aṭangin vbc 40 kan dawng a, referral hospital sak kan rel a, central sorkar aṭangin a umzuina tur pawh beisei tur a awm chuang lo. A hmun tur ngaihtuahin kan inrawn khawm a, hun rei zawka la ṭhanglian zel tur a nih hre chungin Falkawn kha kan thlangta a ni. Kan sum neih khan damdawi-in building leh quarters a daih chin chin kan sa ta a, referral hospital chu a taka kalpui turin sum kan nei zui ta si lo a, hun rei tak a khaihlak ta a ni," a ti.
MIMER tiin tuna ZMC chu chhunzawm a nih thu leh damdawi-in hming atan mi nawlpui tana lam/sawi awlsam zawk tura rawtna tam tak zingah Zoram Medical College tih an thlan thu sawiin Zoramthanga chuan, "Hmathlir fel tak neia hmasawnna hna hi kalpui a ngai a, a tira hmathlir thui tak nei chunga Falkawna kan lo dah hi a fuh em em a ni. Chutiang bawkin hmathlir fel tak neiin MINECO-te pawh din a ni," a ti a, thil dang dangah pawh hmathlir fel tak zarah hmasawnna duhawm tak tak hi kan hmu zel dawn niin a sawi.
Chief Minister hian ZMC Academic Building thar hi a hawng nghal a, doctor zirlai tiṭhate hnenah lawmman a sem bawk.
Health minister Dr R Lalthangliana pawhin thu sawiin, "Kan ramah doctor indaih lohna a nasa a, nimahsela, ZMC zarah rei loteah Mizoram hian doctor kan indaih thuai dawn a ni. Amaherawh chu, MBBS china kan lungawi mai a thiang lo," a ti a; ZMC-in zirna sang zawk a kalpui huna faculty ṭha tak tak ni thei tura theihtawp chhuah turin zirlaite a chah.
Academic Building thar hi Ministry of Health & Family Welfare aṭanga hmuh cheng vbc 60 senga sak a ni a; consultant hi HSCC (India) Ltd. niin, contractor chu M/s MP Khaitan an ni. ZMC-ah hian thawktu mi 723 leh MBBS batch 5-na zirlai mi 489 an awm mek a ni. Batch tinah hian seat 100 awm a, seat 70 chu Mizoram state quota niin, All India Quota 15 leh Non Resident India quota 15 a awm bawk.
Chief Minister thusawi ṭhenkhat
▶ A tirah Central aṭangin vbc 40 kan dawng a, Referral Hospital sak kan rel.
▶ Central sorkar aṭangin a umzuina tur pawh beisei tur a awm chuang lo.
▶ Kan sum neih khan damdawi-in building leh quarters a daih chin chin kan sa.
▶ Referral Hospital chu a taka kalpui turin sum kan nei zui ta si lo a, hun rei tak a khaihlak.
▶ MIMER tiin tuna ZMC chu chhunzawm a ni.
▶ A hming atan mi nawlpui tana lam awlsam zawk tura rawtna tam tak zingah Zoram Medical College tih kan thlang.
▶ Covid hripui vang khan central sorkar aṭanga hmasawnna hna kan thawh vena tur sum lo kal tura beisei lokal thei ta lo kha a tam em em.
▶ Chu phurrit phur chung chuan kan mamawh em em ZMC-in hma a sawn theih nan sum kan ngaihtuahsak hram hram ṭhin.