Governor-in exhibition buatsaih a rawt

Governor Dr Hari Babu Kambhampati chuan nimin khan Raj Bhavan-ah Commerce & Industries department hotute a kawm a; October 2-ah Mahatma Gandhi piancham lawmna pualin Raj Bhavan-ah handloom, handicrafts leh tualchhung kut hnathawktute thil siam dangte tih larna tur fair/exhibition buatsaih a rawt.

Governor Dr Hari Babu Kambhampati chuan, state economy tana handloom, handicrafts leh cottage industry dangte a pawimawh thu a sawi a, "Heng kutchhuakte hian Mahatma Gandhi nen inzawmna nghet tak an nei a, India Hnam Pa piancham phaah hian handloom leh handicraft fair buatsaih hi thil tih âwm tak a ni," a ti.

Fair/exhibition hi buatsaih a nih chuan Raj Bhavan chu mipui tan hawn a nih tur thu te, handloom leh handicraft hmanga eizawngtute ṭanpuina leh an kutchhuakte vawrh larna remchang a nih dawn thute Governor chuan a sawi bawk.