MKHC-in Mizo dana man inhlan inneihna tlinga pawm an duh lo; Pawm lo turin Chief Minister an ngen

Mizoram State Law Commission-in Mizo hnam dana inneih chungchang an rêlah, biak-in thleng kher loa Mizo dana man leh mual inhlan chu inneihna tlinga pawm an rêl chu Mizoram Kohhran Hruaitute Committee (MKHC)-in an duh lo a, an duh loh thu Chief Minister an hrilh.

Tarlan tawh angin, August 4, 2023-a Mizoram State Law Commission ṭhukhawm chuan 'Mizo inneih, inṭhen leh rokhawmna dan, 2024' siamṭhat chungchang an sawiho. Mizo Customary Law siamṭhatna tura rawtna an pawm zingah, biak-in thleng kher loa Mizo dana man leh mual inhlan chu inneihna tlingah pawm ni se, tih a tel a; tuna tih dan pangngai, biak-ina inkutsuih chu la kalpui tho tur a ni.

MKHC hruaitute hi chief minister Zoram-thanga'n a sàwm angin nimin khan an lêng a, thingpui an inho a, Mizo hnam leh Mizoram kaihhnawih thil chi hrang hrang an sawiho.

MKHC hruaitute chuan, Mizoram Law Commission-in Mizo hnam dana chuang tur, inneih chungchanga 'Biak-in thleng kher loa Mizo dana man leh mual inhlan chu inneihna tlingah pawm ni se,' tih chu an duh loh thu Chief Minister an hrilh a ni.

MKHC chairman Rev. Dr C Chawng­hmingliana chuan, "He thil hi MKHC chuan kan ngai thu tak hle a, Law Commission rel dan hi rem kan ti lo," a ti a; Mizoram Law Commission thuthlukna chu Chief Minister hnen a thlen hunah pawm lo turin CM Zoramthanga an ngen tih a sawi.

Tarlan tawh angin, Mizoram sorkar thuchhuahin a tarlan dan chuan, 'Mizo inneih, inṭhen leh rokhawmna dan, 2024' hi Law Commission hmasa ber, R Lalrinawma kaihhruaiin an buaipui tawh a, John Siamkunga chairman a nih laiin zût mâm niin, kum 2014 khan Mizoram Legislative Assembly-in a pawm a, February 13, 2015-ah hman ṭan a ni.

Dan chu siamṭhat leh a ngaia hriat a nih avangin Lal Khobung kaihhruai Law Commission-in an ennawn leh a, Central YMA, MHIP Gen. Hqrs. leh mimal aṭangtein siamṭhat leh tihdanglam rawtnate an dawng a, an hrual mûm hnai tawh a ni.

CM Zoramthanga chuan nimina MKHC hruaitute nena an inkawm chungchang hi social media-ah dahin, inkawmhona chu MKHC Chairman leh Synod Moderator-in Pathian hnena a kawltir hnuah Mizoram hun tawn mek chungchang leh thu pawimawh chi hrang hrang an sawiho tih a tarlang.