MSCPCR-in insawifiah turin Delete Kohhran hruaitute a ko

Naupangte humhimna lama hma latu Mizoram State Commission for Protection of Child Rights (MSCPCR) chuan Delete Kohhranin dan an bawhchhia nia hriaiin, insawifiah turin an hruaitute an ko.

Delete Kohhran hian dan an bawhchhia nia hriat vangin MSCPCR chuan CPCR Act, 2005 Section 13(1)(j) 'Deprivation and Violation of Child Rights' tlawhchhan leh MSCPCR Rules, 2017-in thuneihna a pek angin Delete Kohhran hruaitute hi insawifiah turin an ko a; nimin khan Delete Kohhran hruaitute chu MSCPCR pisaah lêngin, hotute hmaah an insawifiah a ni.

Delete Kohhran hruaitute hi MSCPCR chairman Dr C Lalsangzuala leh hotu dangte'n an kâwm a, naupang dikna chanvo hrang hrangte an hrilhfiah bakah, dan bawhchhetute chu hrem theih an nih thu an hrilh. Delete Kohhran hruaitute pawh an insawifiah ve bawk.

Dr C Lalsangzuala chuan Delete Kohhran hian naupangte sikul kal tir loin, ziak leh chhiar pawh an thiam loh avangin dan an kalh thu a sawi.

Delete kohhran hi Champhai Zotlang Khawulh an tihah an awm a, tunah hian kum 18 hnuai lam naupang 25 an awm nia tarlan a ni.