Muallungthu mi thia chhar thattu a inpuang

August 3, 2023-a Tuirivâng lui bula thia hmuh Lallawmsanga (45) c/o Thankimi, Muallungthu thattu nia rinhlelh Zungnghinthang (27), Myanmar lam mi chu police-in an man tawh a, jail-ah dah luh a ni. Zungnghinthang hi police hmaah a in puang tawh.

Tarlan tawh angin, Lallawmsanga hi hun eng emaw ti chhung chu Tuirivâng lui leh Rangtla báwr velah a khawsa ṭhin a; tun hnaia khawsakna velah hun eng emaw chen hmuh a nih tawh loh avangin khawtlangin July 28, 2023 aṭangin an zawng a, August 3 chhun khan a riahna ṭhin thlám aṭanga metre 500 vela hlá, Tuirivang lui bula feh kawng (link road) chhakah thia hmuh a ni.

Police aṭanga thu dawn danin, Zungnghinthang hi Myanmar aṭanga Mizorama rawn ráltlân, Hnahthial district-a Cherhlun khua refugee camp-a awm a ni a, Muallungthu ramah huan enkawlin a inhlawh ṭhin. Lallawmsanga tualthih chungchangah hian police-te chuan ringhlelin, Lallawmsanga ruang hmuh ní, August 3 zan khan Cherhlunah police-te'n an man a, August 4 khan Kulikawn Police Station thlenpui a ni.

Zungnghinthang hian Lallawmsanga chu a thah a nih thu police hmaah a puang tawh a; a sawi danin, July 9, 2023 zan khan Lallawmsanga awmna thlámah a kal a, a lo ruih avangin an inhnial a, insual zuiin, a rêk hlum a, a tûk July 10-ah thlám aṭanga la chhuakin ruang an chharna hmunah a dah ta niin police a hrilh.

Muallungthu VC leh YMA chuan thuchhuah inṭawm siamin, "Lal­lawm­sanga tualthih chungchangah Police hnen aṭanga thu kan dawn danin, Thanga, Burma ráltlân, Pu Vanlalliana te thlâm, Tuirivang huan enkawltu chuan a that tih hriat a ni," an ti a; thil thleng chu pawi an ti a, an dem tak zet thu te, Thanga chu a na thei ang bera hrem a nih ngei an phût thu te, Kulikawn PS-in theihtawp an chhuahnaah an lawm thute an tarlang.