Lirthei chhiah pe lo leh license thi a tam; Sorkarin khawngaihna hun a hawng dawn

Transport minister TJ Lalnuntluanga chuan nimin khan a pisaah thuthar thehdarhtute a kâwm a; Mizoramah lirthei chhiah pe lo an tam thu leh driving license thi tawh a tam thu sawiin, "Heng mite hian penalty cháwi loa chhiah an pek theih nan August 16, 2023 aṭangin khawngaihna hun hawn a ni dawn," a ti.

TJ Lalnuntluanga chuan, road tax, passenger tax, goods tax, fitness fee leh permit fee-te chu a hun taka pek chuan phurrit a ni lo tih sawiin, "A hun taka pek loh chuan penalty pek tel a ngaih ṭhin avangin pawisa tam tak kan sên a ngai ṭhin," a ti a, a hun taka chhiah pe lote'n penalty chawi loa chhiah an pek theihna hun February 1, 2020 aṭanga October 30, 2022 thleng hawn a nih tawh thu a sawi.

Transport Minister sawi danin, Mizoramah May 31, 2023 thleng khan lirthei 2,91,883 ziah luh a ni a, chu'ng zinga 89,225 chu chhiah pek tur ang pe kim lote an ni. Mizoramah driving license nei mi 4,83,312 an awm a, chu'ng zinga eng emaw zat chu tihnun (renew) a ngai tawh.

Lirthei neitute'n chhiah pe se, Mizoram sorkarin hmasawnna hna eng emaw zat a kalpui theih tur thu sawiin Minister chuan, "AG office aṭanga auditor-te'n lirthei neitute chhiah pek loh vanga Transport department-in audit para an neih ṭhinte hi a bo vek ang," a ti.

TJ Lalnuntluanga chuan, chhiah pek loh vanga lirthei document thi leh driving license nung lo chunga lirthei khalh chu danin a khap bakah a him lo tih sawiin, "Accident tawh pawhin insurance policy la dam mah se, accident claim theih a ni lo," a ti a; chhiah pek loh vang leh license nun loh vangin mi tam takin harsatna an tawh mek thu a sawi.

Transport Minister chuan, lirthei neitute leh khalhtute harsatna tawh mekte Chief Minister-in a hrethiam a, kumin August 16, 2023 aṭanga December 31 thleng penalty chawi ngai loa chhiah pekna hun hawn a remtih thu a sawi a; chhiah pek ngai leh driving license fel lote chu khawngaihna hunah chhiah pe a, an license tinung turin a sáwm a ni.