Kângmei chhuak tur vên pawimawhzia Inzirtir ṭhat reng a ṭul - Home MinisterKângmei Vên Hapta hawn a ni
Nimin khan Mizoram hmun hrang hrangah Kângmei Vên Hapta (Fire Prevention Week) hawn a ni a, Aizawlah chuan Home minister Lalchamliana'n Vanapa Hall-ah a hawng. Home Minister chuan, kangmei chhuak thei vên pawimawhzia mipuite zirtir ṭhat reng a ṭul thu a sawi.
Minister Lalchamliana chuan, kângmei chhuak tur ven a pawimawhzia leh ramngaw humhalh a pawimawhzia chu Mizo mipuiin hre viau tawh mah se, inzirtir nawn reng a ṭul thu a sawi a, "Mei hi thunun a nih loh chuan kângmeiah a chang ṭhin a, mihring mai bakah nungcha leh thlai, ramngaw, sik leh sá thlengin nasa takin kan tawrh phahin chhiatna rapthlak tak a thleng ṭhin a ni," a ti.
Kângmei chu fimkhur tâwk loh vang leh inthlahdah vanga chhuak a ni fo tih sawiin Lalchamliana chuan, "Kan fimkhur zual leh theih nan hun bik neia inzirtir a pawimawh. Sorkarin theihtawp chhuah mah se, tlang ram loneih kan la bànsan hlei thei si lo a, hâl turte chuan meilam an sial uluk a pawimawh," a ti a; lo hâl turte chu lo hâl hun atana sorkar ruahmanna zâwm turin a chah.
Lalchamliana chuan, khawtlang leh tlawmngai pawl hrang hrangte'n ṭan laa kângmei veng tura an thawk chhuak ṭhin chu thlamuanthlak a tih thu sawiin, "Kohhran inkhawmahte pawh kângmei vên pawimawhzia inzirtir zel theih ni se a duhawm," a ti.
Home Minister sawi danin, Mizoramah fire station 14 a awm a, district thar pathumah pawh fire station neih tuma hmalak ṭan mek a ni. Fire station huam chhunga awmte'n kângmei chhuah leh rîkrum thilah helpline number 101 hrilh ṭhin tur a ni a, hmun danga awm tan Police Emergency Response Support System (ERSS) number 112-ah hriattir tur a ni.
Inkhawm kaihruaitu TJ Lalnuntluanga, Environment, Forests & Climate Change minister chuan, Kângmei Vên Hapta hman chhungin mipui hnenah ram kâng leh kângmei hrang hrang laka him inzirtir uar leh zual tum a nih thu a sawi a, "Ramngaw humhalhna tura danin thuneihna hrang hrang a pekte a nihna ang taka kenkawh a nih theih nan nasa lehzualin hma kan la dawn a ni," a ti.
Kângmei Vên Hapta hi February 10-15 chhung hman a ni dawn a, thupui chu 'Kângmei chhuak tur veng la, i ram chhan rawh' tih a ni. District leh khaw hrang hrang tan kângmei vèn kawnga thawk ṭha lawmman siam a ni dawn a, kângmei veng ṭha district leh khuate lawmman chu pakhatna Rs. 50,000, pahnihna Rs. 30,000 leh pathumna Rs. 20,000 a ni.
Mizoram sorkar chuan, lo hâl tur zawng zawngte chu March 15, 2020 ral hmaa hâl vek turin a hriattir a, Lengpui Airport leh a chhehvela lo hâl turte chu tlai dar 3:30 hnu lamah chauh hâl tura tih an ni bawk.