KHAWTHLIR
IPS officer sîksâwi
Mizoram sorkar chuan IPS officer ṭhenkhat a sîksàwi. IGP (Law & Order) Lalbiakthanga Khiangte chu IGP (Headquarters) a ni dawn a, DIG (Hqrs) Neihchungnunga chu IGP (Law & Order) a ni dawn. Shankar Choudhury chu SP, Narcotics a ni dawn a, Shivendu Bhushan chu SP, Cyber Crime a ni ang.
HFW-in hriatpui lo
Health & Family Welfare secretary Esther Lal Ruatkimi chuan nimin khan hriattirna chhuahin, Biological E-Limited, Hyderabad-in tunlaia college leh veng hrang hranga Hepatitis-B mass vaccination an kalpui leh vaccine an pekah, HFW department hriatpuina nei anga an insawi chu HFW department-in an hriatpui lo tih a tarlang.
Rangkachak man
Lunglei police-te chuan August 8, Thawhlehni khan Lungleia hotel pakhatah Lalduhthlani (36) leh Lalramnunpuii (40), Thenzawl nia inchhál ve vete hnen aṭangin rangkachak tlang (gold bar) pathum, a vaia kg. 1.241-a rit an man a; Lungleia Customs department hnenah an hlân chhâwng. Rangkachak an man hi Rs 50,00,000 vel hû a ni.
MZP punkhawm
MZP chuan August 10, Ningani zan dar 8 hian Vanapa Hall-ah 'Hnam tana nunna chánte sûnna leh inpumkhatna inkhawm' an buatsaih dawn a, a duh apiang tel turin an sáwm. MZP chuan, August 10 hi Manipur-a buaina a chhuah ṭan aṭanga ni 100-na a ni tih sawiin, "Buaina hian zual lam a la pan zel a, Manipur-a kan unaute tawrhna kan hre reng a, an tan tih theih kan neih apiang kan ti zel dawn a ni," an ti.
Deworming Day
National Deworming Day, 2023 thawh hnihna chu vawiin hian district hrang hrangah ṭan a ni dawn a, August 17, 2023 thleng a awh ang. Deworming Day-ah hian kum 1-19 inkarte hnenah rúlhût hlo pek beihpui thlak a nih dawn bakah, rûlhûtin a nghawng ṭha lote inzirtina hun hman tur a ni a; zirna-in hrang hranga zirlaite hnenah rûlhût hlo Albendazole pek a ni dawn a, sikul kal lote chu ASHA-te'n an inah kal chilhin an pe dawn a ni.
Lehkhabu tlangzarh
Dr Laltluangliana Khiangte ziah lehkhabu pathum, 'Heroes and anti-Heroes (English)' tih te, Mizo Nataak-2: Rani Ropuiliani (Hindi)' tih leh 'History of Mizo Literature (Mizo ṭawng)' tihte chu nimin khan Governor Dr Hari Babu Kambhampati-a'n Raj Bhavan-ah a tlangzarh.
Custom hiring centre
Hnahthial district agriculture officer C Vanlalhruaia chuan nimin khan Tuipui-D khuaah Krishi Vigyan Kendra hmalaknaa din Custom Hiring Centre a hawng. Centre hi National Innovation on Climate Resilient Agriculture hnuaia din a ni a; kut hnathawktute'n tláwm zawkin mini power tiller, brush cutter, knapsack sprayer, water pump, weighing balance-te an hawh thei dawn a ni.
Kuhva rah man
Assam Rifles sipaite chuan August 8, Thawhlehni khan Champhai Ngúr huam chhungah ram dang aṭanga lak luh kuhva rah ip 100 an man a, Rs 56,00,000 hu a ni.
Ka leilung, ka ram
India zalenna champha kum 75-na champha lawmna, Azadi Ka Amrit Mahotsav khârna atana khua leh veng tina kalpui tur, Meri Maati Mera Desh (ka leilung, ka ram) campaign chu nimin khan Secretariat conference hall-ah chief secretary Dr Renu Sharma-i'n a hawng. Meri Maati Mera Desh campaign hi August 15, 2023 thleng hman tur a ni.
Vaivakawnah in chim
Vaivakawna leimin kal zelah nimin zing dar 3:09 khan Lalramliana Sailo in (RCC building) chu a chim. In chimah hian cheng an awm tawh lo a, a hmain a thlang lam a lo min tawh avangin July 2023 tir lam khan an chhuak vek tawh a ni. Lalramliana Sailo in bula Vanlalkunga in pawh July 26 leh August 6 khan a lo chim tawh bawk. Leimin hian a thlanga NH-54 kawngpui a la hnawh ping a, lirthei kal tlang theih a ni lo.