Congress President-in taxi-te harsatna sutkiansak a tiam

Mizoram Pradesh Congress Com-mittee (MPCC) president Lalsawta chuan, taxi hmanga eizawngte harsatna tawh chu chinfel harsa lo tak vek a nih thu sawiin, sorkarna an siam chuan an harsatnate sutkiansak a tiam.

MPCC thuchhuah tarlan danin, Congress party President hi nimin khan MTA pisaah lêngin, an hruaitute a kâwm a; MTA hruaitute chuan taxi hmanga an eizawnnaa an ruahman leh an harsatnate an lo thlen a ni.

Lalsawta chuan, sorkar chu mipui phurrit chhâwk zângkhaitu tur a nih thu sawiin, "In harsatna leh ruahmannate hi chinfel harsa a ni lo a, chinfel harsa lo tak vek a ni. Hengte hi a ti thei dinhmuna kan din a, sorkarna kan siam phawt chuan kan sutkiansak ang che u. Hei hi Congress manifesto no. 3-ah pawh uluk taka dah a ni," a ti.

Hmasawn turin hma thar lak a ngai tih sawiin Lalsawta chuan, "A ṭha lo paih a, a ṭha zawk hmanga hmalak a ngai. Taxi hmanga eizawnna hi eizawnna satliah a ni mai lo a, ram rawngbawlna a ni. Mizoram rawn tlawhtu khualzin lo dawngsawngtu pawimawh, Mizoram nihphung pholangtu in ni," a ti a; ram tan taxi-a eizawngte leh taxi chhawrtu mipui nena rualkhai zawka kal dun theih a ṭul thu a sawi.

MTA hi Zoram Taxi Owners' Association leh Zoram Taxi Driver's Association inchhûn fina din a ni a, Mizoram pumah taxi 4,000 chuang a awm mek a, Aizawl district-ah taxi 3,500 chuang a awm niin MPCC thuchhuah chuan a tarlang.