SSA zirtirtute'n high court thutlukna khing lêt lo turin sorkar an ngen

Mizoram SSA Teachers Association (MSSTA) chuan, sorkara an ngheh theihna tura High Court-in thutlukna a siam tawh Mizoram sorkarin court sang zawka khin lêt a tum chu ná an tih thu an tarlang a; khing lêt lo a, court thu anga a tahtawla SSA hnuaia zirtirtute dah nghet turin sorkar an ngen.

MSSTA thuchhuah tarlan danin, dinhmun ṭha zawka an awm theih nan kum 2018 khan Gauhati High Court, Aizawl Bench-ah thubuai an thehlut a, High Court chuan March 17, 2023 khan thutlukna siamin, MSSTA chu thiam a chantir. MSSTA member-te chu thla ruk chhungin post thar siam emaw, post awm sa ruak hnawhkhat emaw, regularisation scheme emaw siama a ngheta dah turin Mizoram sorkar a hriattir a ni.

Mizoram sorkara School Education department-ah June 1, 2023 dinhmun angin primary school zirtirtu 1,142 leh middle school zirtirtu 1,170 post ruak a awm mek tih sawiin MSSTA chuan, sorkarah post tam tak a ruak reng chunga ngaihthah an ni reng chu ná an tih thu an tarlang.

High Court thutlukna chu court sang zawka khing lêt lo turin court ram hruaitute an ngen a, lehkha an lo thehlut tawh ṭhin tih sawiin MSSTA chuan, "Kum 2018 inthlan hma leh inthlan hnuah kan ram hruaitute'n dinhmun ṭha zawk min pek tur thu leh kan court case pawh appeal a nih loh tur thu kan hriat hnuah, kan tana ṭha tur zawngin hma min laksak ngei ang tih ring chunga thlamuang taka kan awm laiin, court sang zawka appeal turin engkim peih vek a ni ta hi ná kan ti tak zet," an ti.

MSSTA chuan, "Kan ram sum dinhmun enin, vawi khatah kan nghet vek thei lo a nih pawhin kan court case hi appeal kher loin, scheme-te min siamsak a, a tahtawla min dah kan nghet turin kan phût tlat a ni," an ti a; High Court thutlukna sorkarin khin lêt a tumna chu sût a, dah ngheh an nih theih nan hma la turin Mizoram sorkar an ngen a ni.

MSSTA chuan, SSA hnuaia thawk zirtirtute chu Mizoram hmun hrang hrang, thingtlang hmun kilkhâwr tak takah an thawk a, ṭhenkhat chu kum 20 chuang thawk tawhte an nih thu sawiin, "SSA zirtirtute zarah Mizoram zirna pawhin hma a sawn nasa em em," an ti a; department danga CSS hnuaia thawkte eng emaw zat sorkarin a dah ngheh tawh laiin SSA zirtirtu zingah dah ngheh an la awm lo tih sawiin, "CSS hnuaia thawktu hrang hrang nen kan kalphung a inpersan hle," an ti bawk.