Chhim lama tuilianin ziaawm lam a pan; chhungkaw 658 an inthiar chhuak hman

Khawthlangtuipuiin kum 5 liam ta chhunga a chîm sàn ber a thleng a, hei vang hian Tlabung leh khaw dang 10-a chhungkaw 507 chu hmun himah thiar chhuah an ni; tui chîm chin erawh nimin chhun khan a tlahniam ṭan. Tuichawng lui lian vangin chhungkaw 151 thiar chhuah an ni bawk.

Tlabung aṭanga thu dawn danin, nimin lamah ruah a sûr loh avangin Khawthlangtuipuiin a chîm chin chu nimin chhun aṭang khan a hniam ṭan a; a chîm san lai ber a thlen thlengin Tlabung leh a chhehvel khaw 10-a chhungkaw 507 chu hmun himah an inthiar chhuak a, chu'ng zinga chhungkaw 122 chu Tlabung khuaa mite an ni.

Tuna tuilian hi kum 2018 hnua Khawthlangtuipuiin a chîm san ber ṭum a ni a, Tlabung Bazar Bungkawna hmun ṭhenkhat a chîm thleng hman. Tuilian vanga harsatna tâwkte chu Tlabung SDO (Civil) H Zonunmawia ruahmannain zirna-in, vantlang hall, sorkar in leh sakhaw thila punkhawmna hmun himah thiar luh an ni a; SDO bakah VC leh YMA hruaitute'n harsatna tawkte an tlawh reng a ni.

Border Security Force sipaite pawhin an commandant Krishna Kumar Singh ruahmannain an huam chhunga khaw hrang hrang an tlawh kual a, a remchan angin chhawmdawl hna an thawk a ni.

Chawngte khaw bula luang Tuichawng lui lian pawhin nimin lam khan ziaawm lam a pan a; chutih rualin, tuiin in eng emaw zat a la chîm a, nunphung a la pangngai thei lo. Leimin vangin in 29 a chhe bawk.

Tuichawng lian avang hian Chawngte SDO (Civil) huam chhung khaw hrang hranga chhungkaw 151 chu hmun himah an inthiar chhuak a, chu'ng zinga chhungkaw 100 chuan an chhungte an bèl a, chhungkaw 51 chu relief camp-ah an awm thung.