Lunglei district-a harsatna thleng sawiho

Lunglei District Disaster Management Authority chuan an chairman Ramdinliani, bawrhsap kaihhruaiin nimin khan DC conference hall-ah tun hnaia ruahsûr nasa vanga Lunglei district-a harsatna thlengte sutkian dan tur an sawiho a; Lunglei district-a MLA pahnih - Dr K Pachhunga leh Zodintluanga Ralte ten an telpui.

Ṭhutkhawma tarlan danin, LDDMA-in report an dawn chinah August 6-8, 2023 chhung khan Lunglei district-a hmun 35-ah lei a min a, leimin vanga hmun pasariha kawngpui ping chu tihtlang a ni tawh.

Hmun sarihah lei khî leh tlahniam, hmun thumah lung rem chim, hmun khatah quarry chim, hmun khatah kawng chhia a awm a; tui lianin a tihbuai khaw 11 awmin, Tlabungah tuilian vangin chhungkaw 438 thiar chhuah a ni. Khawmawiah chhungkaw paruk leh Undermanik khuaah chhungkaw pariat thiar chhuah a ni tawh bawk.

Assam Rifles, 2nd MAP leh BSF-te chuan khuarel chhiatna vanga harsatna thleng hmachhawn tura an inpuahchah dan an sawi a; YMA hruaitute pawhin a ṭul hun apianga sorkar pui turin an inpeih thu an sawi.

Thorang bialtu MLA Zodintluanga Ralte chuan, DC pisain ruahsur vanga chhiatna thleng chungchang hun rei lote chhunga chipchiar taka an tarlang thei chu lawmawm a tih thu a sawi a, "Chhiatna tâwk miah lote'n zangnadawmna an dawng tih thâwmte a awm ṭhin a, sawi leh sêl a tam ṭhin. Official-te'n a hmuna in endik lai leh bungraw chhiat dan in chhût lai aṭangin chhiat tâwkte ngeiin ṭanpuina an dawn theih nan fimkhur takin hma la ang che u," a ti.

Lunglei South bialtu MLA Dr K Pachhunga chuan, ruahsur nasa vanga NH-54 kawngpui a pin laia khualzin tangkhang mi 200 chuang tan a biala Ṭhualṭhu khaw mipuiin ei leh in tur an lo buatsaihsak leh DC office-in harsatna sukiang tura rang taka hma an la chu lawmawm a tih thu a sawi.