MNF-in No Confidence Motion kan thláwp dawn - MNF Ṭhalai

MNF ṭhalaite chuan thuchhuah siamin, Parliament session kal meka sorkar rin tâwk lohna (no confidence motion) chu MNF party-in an thláwp dawn niin an tarlang.

MNYF chuan, MNF-in Mizo ram, hnam leh sakhua himna an ngaih pawimawh ber avangin eptu party ṭangrualin Lok Sabha-a no confidence motion an put luh chu MNF-in an thláwp dawn nia sawiin, "Kum 20 chhung silai hmanga India do ngam Pu Zoramthanga kaihhruai MNF hian kan ram leh hnam, kan sakhaw tana pawi thei turah chuan NDA emaw, BJP emaw pawh ni se a do ngam hle tih mipuite'n an hriat kan duh," an ti.

Lok Sabha session-a no confidence motion chung-changah Mizorama eptu party ṭhenkhatin mipui rilru hruai kâwi theih beiseiin thu dik lo an vawrh darh nia sawiin MNYF chuan, "Pawi kan tiin, thu dik lo hmanga mipui bum hreh lo political party kan la awm hi Mizo kan nihna ang pawhin zahthlak kan ti hle," an ti a; Congress leh ZPM party-te chu mipui rilru hruai kâwi tumah an puh a ni.