END-in hmun hnihah heroin an man

Excise & Narcotics department (END) chuan nimin zing dar 6:30 khan Zuangtuiah heroin kg. 1.5 (hawng 86) leh a neitua puh - Biakzaawi (25), Myanmar (Bawngkawn Brigade Venga khawsa mek) leh Priscilla Biaklenmawi (20), Myanmar (Zokhawthara khawsa mek) nia inchhálte chu an man. An pahnih hian Myanmar ram buai vanga raltlana Mizorama khawsa an ni.

Nimin vek zing dar 2:10 khan END leh Central YMA hnuaia CADS thawk dun chuan Thenzawl Vengtharah heroin gram 249 (hawng 20) an man a, a neitua puh Lalhmangaih­tluangi (24) d/o Zodingliana, Thenzawl Vengthar nia inchhál an man nghal bawk.

Heroin vanga mante lakah The Narcotics Drugs & Psychotropic Substances Act, 1985 (NDPS Act) tlawhchhanin thubuai ziah luh a ni a, nimin khan court-ah hruai nghal an ni.