ZORO-in World Indigenous Day an hmang

Zo Reunification Organisation (ZORO) hruaitute chuan nimin khan an pisaah khawvel hmun dang rualin International Day of Worlds Indigenous Peoples an hmang.

ZORO hruaitute hian nimin khan Aizawl Press Club-ah thuthar thehdarhtute an kâwm a; December 1994-a UN General Assembly-in ram leilung fa tlem zawkte (indigenous people) dikna chanvo humhalh leh tungding tura UN Working Group on Indigenous Peoples ṭhutkhawmna hmasa ber hriatrengna atan August 9 chu International Day of Worlds Indigenous Peoples atan a puan thu an sawi a, "Kum 1995 aṭangin kum tin hman a ni," an ti.

Mizoram chu Mizote ta a nih thu sawiin ZORO hruaitute chuan, "Kan tana Pathian min pek a ni, a neitu dik tak kan ni a, khawvel hmun dangah ram kan nei lo a, kan vawng him ngei ngei tur a ni," an ti a; Mizoram chu tu'ma awm hmaa Mizote'n an luah, a chhunga hausakna zawng zawng pawh Mizote ta a nih thu leh chu chu UN Declaration on the Rights of Indigenous Peoples, 2007 pawhin a pawmpui thu an sawi.

ZORO hruaitute chuan, Mizote chu an chenna a hrang angin hnam dangin an koh dan a dang a, Myanmar-ah chuan 'Chin' tih an ni a, Manipur, Tripura leh Bangladesh-ah chuan 'Kuki' tih an ni a, Mizoramah chuan 'Mizo' tih an nih thu an sawi a, "Kan vaiin thisena inzawm, chhûl khat kual kan ni a, unau, inṭhen thei lo kan ni," an ti.