Congress ṭhalai leh police an innawr; LS-a motion thláwp turin CM an ngen

MPYCC-te chuan nimin khan chief minister Zoramthanga hnenah Parliament session neih meka 'no confidence motion' put luh thláwp tura ngenna lehkha pek an tum a, Chief Minister's Office gate bulah police-te'n lo dangin, hun eng emaw chen an innawr.

Congress party ṭhalaite hi magistrate leh police duty-te'n CMO gate chhunga luh an phalsak loh hnuah magistrate duty-te ruahmanna angin an lehkha chu CMO gate páwnah CM private secretary Lalhmansanga hnenah an pe a ni.

MPYCC president Laltawnliana chuan, CMO-ah buaina siam an tum loh thu sawiin, "CM hian official-in BJP sorkar a thláwp dawn lo tih thuchhuah min tihchhuahsak turin kan phût a, ṭawngka ringawt chu kan awih tawh lo. Facebook-a IPR minister Pu Lalruatkima'n BJP an thláwp loh tur thu a post mai mai ang hi kan pawm lo. CAB do zawngin ka vote ang titu khan Mizo mipui min nuihzat chungin CAB thláwp zawngin a vote leh si a, hetianga mipui min phatsanna ang hi thleng tawh lo se kan duh," a ti.

Laltawnliana chuan, Parliament session-ah no confidence motion (no trust motion) chu sawiho mek a ni tih sawiin, "MNF unaute'n hun an neih lai hian kan MP zahawm tak hi BJP lamah vote lo turin kan ngen," a ti a; motion chu thláwp ngei turin Mizoram MP-te an ngen tih a sawi.

MPYCC-in lehkha an thehluhah chuan, Parliament session-ah Manipur state chhunga thil thleng vanga No Confidence Motion lut mek chu Mizoram sorkarin a thlâwp loh an hlauh thu an ziak a, "No confidence motion put luh mek hi Mizoram sorkar hian an thlàwp turzia Mizo mipui hmaa official-a puang turin kan phût a ni," an ti.