Monsoon stock vangin fûr lai pawhin rilṭáma thi an la awm lo - Supply Minister

Food, Civil Supplies & Consumer Affairs (FCSCA) minister K Lalrinliana chuan nimin khan Aizawl Press Club-ah thuthar thehdarhtute kâwmin, FCSCA department hmalakna hrang hrang a tarlang a; kum 2019 - 2022 chhungin fûr laia tla tur buhfai an chhêk khawl ṭhin avangin tun thlengin ei leh bâr tlâkchham vanga rilṭáma thi an la awm lo tih a sawi.

FCSCA Minister chuan, Chief Minister kaihhruainain Mizoram tan theihtawpin ke an pên tih a sawi a, "Fûrpui laia lirthei kalpawh theih lohna khuaa mipuite’n ei leh bâr an tlâkchham loh nan buhfai mamawh tur ang zatte chhêk khâwl lâwk ṭhin a ni. Kum 2019-2022 chhunga monsoon stock avangin fûr chhiat lai pawhin Mizoramah PDS khaihlak loa kalpui a ni a, ei leh bâr tlâkchham vanga rilṭáma thi vawiin thlengin an la awm lo," a ti.

Mizoramin thla khata buhfai a mamawh zat chu quintal 95,000 vel a nih thu sawiin Minister chuan, "Hetih lai hian, central aṭanga NFSA atan buhfai normal allocation kan dawn chu qtl. 54,798.30 a ni a, indaih lohna hi open market procurement (OMP) hmangin kan lei ṭhin a, FCI (Food Corporation of India)-in buhfai an neih chángin OMSS(D) aṭanga lei zeuh cháng kan nei bawk," a ti a; MNF sorkar hnuah December 2022 thlengin chini quintal 13,323 lei a ni tawh tih a sawi.

K Lalrinliana chuan, Mizorama ration card zawng zawng computerised vek a ni tawh tih sawiin, "NFSA ration card leh Aadhaar thlun zawm zat 98% a ni a, 100% ni turin chak takin hmalak zel a ni," a ti a; ration card siamah mipui tana awlsam zawk nan common service centre-te nen thawkho turin hmalak mek a nih thu a sawi.

Sorkar laipui hmalaknain Mizoramah hlawhtling takin One Nation One Ration Card kalpui a nih thu sawiin, "August 2022 thla khan ONORC hnuaia buhfai latu ration card awm zat chu 299 a ni," a ti a; FCSCA hnuaiah fair price shop (retailer) 1,255 a awm mek tih sawiin, "FPS zawng zawngah Electronic Point of Sale (ePOS) device vuah vek tawh a ni," a ti.

Supply Minister chuan, buhfai lei leh hralhah Mizoram sorkarin sum a hmuh zat tarlangin, kum 2019 aṭanga January 17, 2023 thlengin Rs 4,71,82,29,894 a hmuh thu a tarlang.

Pradhan Mantri Garib Kalyan Yojana (PMGKAY) hnuaia Covid-19 vanga inkhàrkhip lai, May 2020 aṭangin Mizoramah a thlawnin buhfai sem a ni a, National Food Security Act (NFSA) hnuaia awm AAY leh PHH-te hnenah a thlawnin thla khatah mi pakhat zelah buhfai kg. 5 pek a ni ṭhin. May-November, 2020 chhungin buhfai metric ton 23,387.53, May-December, 2021 chhungin metric ton 26,679.25 leh 2022 chhungin metric ton 39,596 sem a ni.

Sorkar laipui scheme Atma Nibhar Bharat hnuaiah kum 2020-2021 chhungin a thlawnin buhfai, dailuah leh chánâ sem a ni. Buhfai metric ton 668.215 hmuh aṭangin metric ton 250.01 sem a ni a; dailuah metric ton 446.215 hmuh a nih laiin metric ton 777.025 sem niin, chánâ metric ton 808.025 hmuh aṭangin metric ton 806.775 sem a ni.

FCSCA Minister chuan, March 2020 tâwp lama inkhàrkhip hnuah AAY leh PHH-a awmte hnenah a thlawnin Mizoram sorkarin buhfai a sem bawk tih sawiin, "Non-NFSA zinga veng/khua tina VC/LC-te'n free ration pek ngai nia an hriatte leh Building & Other Construction Workers Welfare Board (MBOCWWB)-a inziak lutte pawh thla khat quota ṭheuh Mizoram sorkarin buhfai a thlawnin a pe bawk," a ti.

K Lalrinliana chuan, April-June, 2020 chhungin Mizoram sorkarin buhfai quintal 85,128.45 a sem a, chuta tan chuan MBOCWWB aṭangin Rs 6,40,67,820 hmuh niin, Rs 6,10,97,592 hman a ni a, a báng Rs 29,70,228 chu MBOCWWB-ah pek lêt a nih thu a sawi.

Kum 2020 khan total lockdown laiin NFSA-a awm lote hnenah thla tin mi pakhat hnenah buhfai kg. 8 pek a nih thu leh chumi bakah kg. 5 dang, kg. khat Rs 15-in laktir a nih thu leh buhfai qtl. 27,177.15 sem a nih thu a sawi bawk.