Nau piang hlim pawhin leibá Rs 98,958 nei ang kan ni - MPCC

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute an kawm a; kum 30 chhunga Mizoram sorkar leiba leh kum nga chhunga MNF sorkar hnuaia leibá a intluk thuak tawh thu leh nau piang hlim pawhin leibá Rs 98,958 a nei nghal ang a nih mek thu an sawi.

MPCC Media chair­man Dr Lallian­chhunga chuan, MNF sorkarin sorkar awm leh tur tana rulh huphurhawm leh chêt tiharsa tham leiba a hnutchhiat dawn niin a sawi a, "Kum 2023-a Mizorama mihring awm tur zat (projected population) 13,70,000 aṭanga chhûtin nau piang hlim pawhin leibá Rs 98,958 nei ang kan ni," a ti.

Dr Lallianchhunga chuan, "Mizoram state a nih, kum 1987 aṭanga kum 30 chhunga leibá a neih chhoh zel tling khawm leh MNF sorkarin kum nga chhunga leiba a neih belh zat hi a intluk thuak tawh. Hetiang khawpa leiba pung chak hian Mizoram sorkar a la awm ngai lo," a ti a; sum leh pai enkawlnaa MNF sorkar ang em ema hlawhchham leh tâlbuai Mizoramah sorkar a la awm ngai lo niin a sawi.

MNF sorkarin leiba rulhna atan leiba dang a insiam belh zel tih sawiin Lallianchhunga chuan, "Mizoram hi MNF sorkar hnuaiah leiba thangah a táng mek. The Indian Express-in August 1, 2023-a a tarlan danin, Mizoram chu state sum thawh chhuah, Gross State Domestic Product aṭanga chhûtin India ram state leh union terrritory zingah leiba ngah ber a ni," a ti.

MPCC Media Chair­man chuan, leiba neih zat enin, Mizoramin thusawi thiam ringawt ni lo, sum leh pai enkawl thiam hruaitu a mamawhzia a lan thu te, kum 2023-24 budget-a Mizoram leiba zat tura chhût chu vbc. 13,557.32 a nih thu te, MNF sorkarin kum tin budget-a leiba zat tura chhût lâwk aia tam leiba a neih ziah thu te, MNF MLA fel tak tak awm mah se, a lu ber Chief Minister enkawlna hnuaiah thil ṭha lo an hriat pawh an dodal ngam loh thute a sawi bawk.