Home minister Amit Shah thusawi MP Vena'n Parliament-ah a sawisel

Nimina Parliament session-ah Rajya Sabha MP K Vanlalvena chuan Manipur tribal-te chungchanga Union Home minister Amit Shah thusawi nasa takin a sawisel a, eptu MP-te an bengchhen zui ve nghal avangin session tihtawp a ni.

MP K Vanlalvena chuan, Union Home Minister-in Manipur tribal-te chu Myanmar mi angin a sawi tih sawi chhuakin, "Mizoram MP, tribal MP ka ni. British ho luh hma, kum 200 kal taah khan he ramah hian an lo awm tawh," a ti a, a ṭawngrinna (microphone) hman tihtawpsak (off) nghal a ni.

Mizoram sorkar thuchhuah tarlan danin, K Vanlalvena ṭawngrinna (microphone) an tihnun leh hnuah Mizoram MP chuan Manipur-a biak-in 300 hâl chu communist ramah pawh thleng ngai lo a nih thu a sawi a, "World record thar a ni. Hmarchhak tlang ram hi kan ta a ni," a ti a; mahni ram humhalh turin hlauh an neih loh thu a sawi.

Vanglaini palai zawhna chhangin K Vanlalvena chuan, chawhma lam session chu Manipur boruak avangin a hun hmaa tihtawp a nih thu a sawi a, "Chawhnu dar 2-ah session ṭan leh a ni a, ṭan vel'ah Rajya Sabha Chairman chu a ṭhutna bula kal chilhin thu sawi ka dil," a ti.

K Vanlalvena chuan, thusawi tura koh a ni ve lawk lo tih sawiin, "Min ko har lutuk a, thinrim tawh nen, min ko chiaha ka aw kî pawh a sang tawh hle," a ti a; nimin ang rêng rênga aw ki sangin Parliament House-ah thu a la sawi ngai loh thu Vanglaini a hrilh.

Rajya Sabha MP sawi danin, a microphone tihtawp a nih hnuah eptu member-te chu Manipur chungchang vang thoin an bengchheng zui ve nghal a, session kal lai tihtawp a ni. Session hi vawiin chawhma dar 11-ah ṭan leh a ni ang.