Gas home delivery tih ngei a ngai; Lungawi lote tan zualko theih a ni

Food, Civil Supplies & Consumer Affairs (FCSCA) department hotute chuan, gas (LPG) home delivery chu Aizawl leh district khawpui tina gas agency/distributor zawng zawngin an tih vek tur a nih thu an sawi a; home delivery tih loh vanga lungawi lohna neite chu Indian Oil Corporation-ah emaw, FCSCA-ah emaw thlen turin an chah.

FCSCA minister K Lalrinliana chuan nimina Aizawl Press Club-a press conference a neiha statement a siamah, "IOC LPG connection nei mi tu pawhin online booking an tih chuan gas agency-in home delivery an tihsak tur a ni a, hei hi dan ding lai niin, nikum December aṭanga hman ṭan tur khan FCSCA department-in thuchhuah a siam tawh," a ti a; chutih rualin, home delivery hlawhtlinna chu consumer-teah thui tak a innghah ve thu a sawi.

Zawhna chhangin FCSCA department hotute chuan, home delivery chu gas agency zawng zawngin an ti vek tur a nih thu an sawi a, "Consumer-in a book aṭanga darkar 48 chhungin mi dangin book ve lo mahse an deliver tur a ni a, an deliver loh chuan complaint theih a ni. Consumer-te inah an deliver tur a ni a, a bûkna pawh an keng nghal ngei tur a ni," an ti.

Aizawla veng ṭhenkhatah gas agency ṭhenkhatin distribution point-ah gas an la sem a, gas lâk dawnah online booking an tih chawp ṭhin thu press mite'n an sawi chungchangah FCSCA hotute chuan, "Chutiang chu agency-te'n an tih loh tur a ni a, tih dan tur a ni lo," an ti a; home delivery chungchanga lungawi lohna nei tan phone no. 0389-2314375 leh 1967 (toll free)-ah thlen turin mipui an chah.

FCSCA Minister sawi danin, LPG home delivery enchhinna atan September 2019 khan College Veng, Aizawlah kalpui a ni a, chumi hnuah veng pali-ah kalpui a ni. Kum 2022 tìr aṭangin Aizawla gas distributor 11-te chu home delivery kalpuina tur veng pathum ṭheuh thlang tura tih an ni a, veng an thlan 29-ah July 1, 2022 aṭangin kalpui a ni.

Kum 2019 aṭanga tun thlengin Mizoramah LPG distributor pasarih leh filling station (petrol pump) 24 hawn belh a ni a; tun dinhmunah Mizoramah gas distributor 60 an awm mek a, chungte chu LPG distributor pangngai 24, RGGLV distributor 29 leh defence/project distributor pasarih an ni. Defense/project distributor tel loin gas connection 3,23,059 a awm mek bawk.