CM-in West Phailenga phûllem phah a hawng

Chief minister Zoramthanga chuan nimin khan West Phaileng Residential School khelmuala phûllem phah thar leh community service centre (CSC) a hawng.

West Phaileng Residential School sakna atan Pradhan Mantri Jan Vikas Karyakram (PMJVK) aṭangin kum 2019-20 khan cheng nuai 3,286.34 hmuh a ni a, project zingah phullem phah telin, cheng nuai 549.91 hmangin phah a ni. CSC building chu PMJVK sum nuai 140 sénga sak a ni .

Phullem phahna turin December 15, 2020-ah CM-in lungphùm a phúm a, Decor India, Guwahati-in March 2021-ah phah ṭanin, July 2023 khan an zo. Phûllem phah chin zau zawng chu meter 100-a sei, metre 60-a zau a ni a, football inkhelhna tur bik zau zawng chu metre 95x56 a ni. Khelmual sirah Residential School building hrang hrang sak mek a ni.

Covid-19 léng kara West Phailenga hmasawnna thlengte chu bialtu MLA Lalrintluanga Sailo inpekna vang a nih thu sawiin Zoramthanga chuan, inthlan lehah pawh mipuiin MNF lam hawia vote an pek ngei a rin thu a sawi a, "He bialah hian Pu Rintluanga tluka hmasawnna kalpui nasa an la awm ngai lo. MLA 40 zingah kawngpui siamna tur pawisa nuai 7,000 chuang sawi chhuak thei awm chhun a ni," a ti.

Zoramthanga chuan, "Kum nga kal taa hmasawnna en ila, tute nge ngawi renga hna thawk? Ṭhenkhat chuan hmasawnna an hmu lo a, mipuite beidawngin an dah a, mipui beidawngte hîp nan kalphung thar an zuar. Mipuiin tute nge an nih an hre chiang a, an enchhin duh lo," a ti bawk.

Hawnna inkhawmah hian Sports minister Robert Romawia Royte leh bialtu MLA-te pawhin thu an sawi a ni.