MTP-in hma la turin Governor an ngen

Mara Thyutlia Py (MTP) Gen. Hqrs hruaitute chuan nimin khan Raj Bhavan-ah Governor Dr Hari Babu Kambhampati an kâwm a; Mara Autonomous District Council chhunga hmalakna ṭhenkhat leh bawhzui ngaite thlenin, hma laksak turin an ngen.

MTP hruaitute chuan, hun rei tak chhung chu MADC-a ṭhalai zingah sipaia tling an tlem thu sawiin, an vei thu an sawi a; tun hnaiah sipai lak awm ṭhinah Siaha district ṭhalai an tlin ve theih nan kawng zawnsak turin an ngen a ni.

Siahaa General Nursing & Midwifery School sak mek chu hun rei tawh tak aṭangin ngaihven a ni lo tih an sawi a, kuminah sak puitlin a nih theih nan leh Nursing School a nih anga kalpui a nih theih nan hma la turin an ngen bawk.