National Deworming Day hman a ni

Nimin khan Mizoram hmun hrang hrangah National Deworming Day thawh hnihna (second round) hman ṭan a ni a, kum 1-19 inkarte hnenah rúlhût hlo (Albendazole) pek a ni.

National Deworming Day hi kum 2015 khan kalpui ṭan niin, Mizoramah kum 2016 aṭangin kum tin hman ṭhin a ni a, kum khatah vawi hnih hman a ni ṭhin. Naupang leh tleirawl kum 1-19 inkar hnenah a thlâwnin rúlhût hlo pek ṭhin a ni. Sikul leh anganwadi centre-ah kalin naupangte damdawi an entir a, nimina ei ve thei/hman lote tan August 17, 2023-ah a thualna (mop-up) hun hman leh a ni ang.

Deworming Day hi Aizawl West Chief Medical Officer pisa chuan Kulikawn Anganwadi Centre II-ah an hmang a, Aizawl West CMO Dr Thani Pachuau-in a hawng. Aizawl West district-a kum 1-19 inkar mi 60,525 hnenah rúlhût hlo pek an tum a ni. CMO, Aizawl East district chuan Heath Services conference hall-ah an hmang a, CMO Dr Lalparliani’n a hawng.

Lunglei district-ah chuan Chanmari Primary School II-ah hman a ni a, bawrhsap Ramdinliani'n a hmanpui. Lunglei district-ah hian sikul/anganwadi 1,058-ah naupang kum 1-19 inkar mi 75,000-te rûlhût hlo pek tum a ni.

Champhaiah chuan GM High School-ah bawrhsap James Lalrinchhana'n a hawng a, Champhai district (Khawzwl district telin) chhunga naupang 52,610-te damdawi pek tum a ni. Hnahthialah pawh Health & Family Welfare leh School Education department ṭangkawpin Hnahthial Middle School-ah Deworming Day hawnna inkhawm an buatsaih bawk.