MKHC hruaitute tihthlabâr tumah MNYF-in Congress party an puh

MNF ṭhalaite chuan Congress party chu Mizoram Kohhran Hruaitute Committee (MKHC) zahna nei lo leh tihthlabâr tumah an puh a, ngaihdam dil turin an phût.

MNYF chuan, "August 9, Nilainia Congress party-in MKHC leh chief minister Pu Zoramthanga te inkawmna tihbuai tuma CM gate bula tharum an thawh mai kha MNYF chuan pawi a ti hle a, Mizorama thil thleng ngai lo leh kan sakhaw rawngbawltute zahlohna a nih avangin mipui hmaa ngaihdam dil ngei turin kan phût," an ti.

MKHC leh Chief Minister chu chawhma dar 11 aṭanga inkawm tur an ni a, chumi hma zing lamah Congress party-te CM bangla tualah punkhawm an tum tih hriain, Parliament session neih meka No Confidence Motion put luh chungchanga MNF leh Mizoram sorkar dinna Chief Minister Office aṭangin hrilhfiah an nih thu MNYF chuan an tarlang.

MNYF chuan, CM chu MKHC nen an inkawm dawn avangin pungkhawm lo turin Congress party chu ngen an nia sawiin, "Sakhaw rawngbawltute leh CM inkawmna tihbuai tumin punkhawm an huaihawt lui ta tho a, Synod Moderator haw tur pawh hun rei tak CM gate bulah an dang bet a ni," an ti.