NEP 2020 chungchang sawiho a ni

Nimin khan Vanapa Hall-ah Higher & Technical Education (HTE) minister Dr R Lalthangliana hoin New Education Policy (NEP) 2020 Implementation Review Meeting neih a ni.

HTE Minister chuan, a taka NEP kalpui turin thil pawimawh leh hriat chian ṭul a awm thu sawiin, "Khawvel changkang zelin thiamna sang zawk ken tel tam tak a nei a, ṭhalaiteah thiamna satliah mai ni lo, thiamna tak tak leh a taka hman ṭangkai theih tur chi tuh a ngai tawh," a ti.

National Assessment and Accreditation Council (NAAC) endiknaah ṭan lak a ngaih thu sawiin Minister chuan, "NEP tihhlawhtlinna atana pawimawh, state university chu Cabinet meeting-a sawiho a nih hnuah din a nih theih nan a ṭul angte bawhzui turin thutlukna siam a ni a, a bika ngaihtuahtu tur team din a ni," a ti a; zau zawka inrâwnkhawm tum a nih thu a sawi.

Ṭhutkhawm hi HTE secretary Esther Lalruatkimi'n a kaihruai a, college hrang hrang hotute an tel. MZU registrar Prof. Lalnundanga, NEP state nodal officer Prof. Benjamin Lalrinsanga, RUSA additional state project director Dr Zarzoliana, HTE deputy secretary K Lalhmangaihzuala leh director Sangchhin Chinzah ten thu an sawi a; zawhna leh chhanna hun hman a ni.

Sorkar thuchhuah tarlan danin, NEP kalpui tura inpuahchahna zingah college tinte'n Institution Development Plan an thehlut tawh a, mandatory accreditation zawh vek tawh niin, refresher course leh training hrang hrang kalpui ṭhin a ni. College pathumah post graduate multi displinary course kalpui a ni a, skill enhancement course kalpui thuai tum a ni bawk.