Aizawl College-ah NDPS Act inzirtir

Mizoram State Legal Services Authority (MSLSA) chuan nimin khan Aizawl College conference hall-ah Narcotic Drugs and Psychotropic Substances (NDPS) Act chungchang inzirtirna hun an buatsaih a; Gauhati High Court judge Justice Michael Zothankhuma, MSLSA executive chairman ni bawkin a hmanpui.

Justice Michael Zothankhuma chuan, "Kan ram hmelma ruihhlo hi theihtawpa kan do tlat a ngai. Ruihhlo bâwiha táng mekte chhan chhuak tur hian theihtawp kan chhuah a ngai a, a la ti lote ruihhlo bâwiha an luh lohna turin ṭan lak a ngai," a ti.

Michael Zothankhuma chuan, "Mizoramah ruihhloin bu a khuar mek lai hian ṭhalaite kan harh chhuah a ngai. Ruihhlo vangin ṭhalai tam takin harsatna an tâwk mek a, ram hmasawnna hna thawk tur ṭhalai tam tak home leh jail-ahte khung boa an awm hi a pawi em em a ni," a ti a; kuminah August 9 thlengin heroin kg. 108.835 man a nih tawh thu a sawi.

Zirhonaah hian resource person Dr Chawnglungmuana'n ruihhlo tite chhan­chhuahnaa hmalak dan tur leh a enkawl zel dan tur te, ruih theih thil ṭhat lohzia leh mihring nun a nghawng dan te, ruihhlo laka inven dante zirlaite a zirtir a; Aizawl College vice principal Dr Lalsangzuala Khiangte-in thu a sawi bawk.