KHAWTHLIR

Thisen pe

Kolasib-a Isua Krista Kohhran chuan nimin khan Kolasib District Hospital blood bank-ah thisen unit 11 an pe a, petute mipa pariat leh hmeichhia pathum an ni.

Deworming Day

Aizawl West Chief Medical Officer pisa chuan nimin khan Kulikawn Anganwadi Centre II-ah National Deworming Day thawh hnihna (second round) an hmang a, Aizawl West CMO Dr Thani Pachuau-in a hawng. Deworming Day second round-ah hian Aizawl West district chhunga naupang kum 1-19 inkar 60,525 hnenah rúlhût hlo (Albendazole) pek tum a ni a, sikul leh anganwadi centre-ah kal chilhin pek tum a ni.

Kawngpui a tlang

Aizawl DC Nazuk Kumar chuan Vaivakawna leiminna hmun hnuaia NH-06 kawngpui chu lirthei chi tin tlân theiha tihtlang a nih thu a tarlang. Kawngpui chhak lam chu min belh mai thei a nih avangin kawngpuiah zan dar 9 leh zing dar 4:30 inkarah lirthei leh kea kalte kal tlang lo turin DC chuan a hriattir a; lirthei tlân dan turah sorkar thu ngaichâng tur leh ngai pawimawh turin mi tin a ngen bawk.

Kuhva rah man

Assam Rifles sipaite chuan August 9, Nilaini khan Melbûk ramah Myanmar aṭanga dan loa lak luh kuhva rah ip 160 (kg. 12,800 vel) an man a, Customs hnenah an hlan. Kuhva rah man hi Rs 89,60,000 hù a ni. Assam Rifles-te hian nimin khan Champhai Khankâwnah ram dang meizial báwmpui (case) 33 an man bawk a, Rs 42,90,000 hû a ni.

In sak lai a chim

August 9, Nilaini zan dar 11:30 vel khan Zonuam, Aizawla in sak lai a chim a, thi leh hliam an awm lo. Thu dawn danin, in hi Electric Veng, Aizawla mite sak a ni a, in sakna bula ko a min avangin a chim nia hriat a ni. In chim vang hian Secretariat Complex aṭanga Mizoram University panna kawng a ping a; in chim chhak lama awm in dang pakhata cheng chhungkaw pakhat chuan bungrua an thiar chhuak bawk a ni.