Cyber crime chungchang journalist-te zirtir; Social media account inchhuhsak a hluar

Mizoram Police hnuaia Cyber Crime Police Station hotute chuan nimin khan Aizawl Press Club-ah thuthar thehdarhtute pualin internet kaltlanga pawikhawihna chungchang zirhona, 'Sensitization workshop on cyber crime' an buatsaih. Tunlaiin inbumna hmanga social media account inchhuhsak a hluar thu tarlan a ni.

Cyber Crime PS hotute chuan, internet kaltlanga inbumna tunlaia an khawih zinga 50% vel chu social media account inchhuhsak chungchang a nih thu an sawi a, "Mipui kan fimkhur a ngai a, kan social media account-te hi mi dang khawih leh luh awlsam theih turin password inhrilh tawn loh tur a ni," an ti a; misualin thil dik lo tih nan social media account an hman theih avangin fimkhur turin mi tin an ngen.

Mizoramah cyber crime a hluar thu sawiin police hotute chuan, "Online-a thil lei chungchangah Facebook leh mobile application dang dang hmangin inbumna a tam a, application kan download dawnin rating-a 5 star-te hi an rintlak tihna a ni ngawt lo a, review en nachang hriat a ṭha," an ti.

Internet kaltlanga bumna tâwkte tan Cyber Crime PS phone number 8119935420 leh 0389-2320416 ah hriattir theih leh puihna dil theih a ni.