NDA sorkar rin tâwk lohna motion-a MP pahnih dinnaah MPCC an lawm

Mizoram Pradesh Congress Committee (MPCC) president Lalsawta chuan, Mizoram MP pahnihte'n NDA sorkar rin tawk lohna, no confidence motion an thlawp chu lawmawm a tih thu a sawi a; Mizoram inthlanpui a hnaih avanga BJP zawm lo anga inlantirna leh Mizo mipui bumna ni lo se a duh thu a sawi bawk.

Nimina Congress Bhavan-a MPCC political session-ah Lalsawta chuan, "Mizoram MP pahnih Pu K Vanlalvena leh Pu C Lalrosanga ten Parliament-a BJP kaihhruai NDA sorkar rin tâwk lohnaah 'NDA sorkar hi kan ring tâwk lo e,' tiin a thláwp zawngin voice vote an pe hi a lawmawm. Hei hi MNF Headquarters emaw, Chief Minister's Office aṭangin emaw, Mizoram mipui hriatah MNF party-in NDA sorkar a thlàwp loh thu puangzar ngei rawh se tih hi ka ngenna a ni," a ti.

Congress party President chuan, "Inthlan a hnai a, BJP zawm lo anga Mizo mipui min bum leh mai mai dawn a nih chuan kan tuar nasa tawh, bum tlâk kan ni tawh lo," a ti a; kum 1966-a Mizote tawrhna chu a tâwk viau tawh tih a sawi.

Lalsawta chuan, kum 1976 khan prime minister Indira Gandhi hoin Constitution Preamble siamṭhat a ni tih sawiin, 'Secular' tih belh a nih thu a sawi a, "India ram, sakhaw tam tak vuan mipui hian keini hriatthiam dana Secular India kan tih ang hi kan neih loh chuan sakhaw tê deuhte chu nêkchêpa awmin, harsatna tam takin min la tlakbuak ang a, sakhaw lian zawk la vuan lo thei loin India ram hi kan la awm mai ang tih hi thil hlauhawm tak a ni," a ti.

MPCC treasurer Dr Lalmalsawma Nghaka pawhin Mizoram MP pahnihin BJP kaihhruai NDA sorkar rin tawk lohna voice vote hmanga an thláwp chu lawmawm a tih thu a sawi a, "MNF-in BJP kaihhruai sorkar an rin tâwk tawh loh tak zet chuan NDA leh NEDA aṭanga inla hrang a, sakhaw zalenna duhtu pawl Congress party hmalaknaa din Mizoram Secular Alliance-a tel ve turin MNF-te hi kan sáwm a ni," a ti. ZPM Leader-in BJP an thawhpui dawn leh dawn loh a la sawi thei lo nia sawiin, pawi a tih thu a sawi bawk.