Corruption do turin kan inpeih tawh - Dr Vanlalthlana

ZPM Legislature Party secretary Dr Vanlalthlana chuan nimin khan ZPM pisaa political training-ah thu sawiin, "Corruption do turin kan inpeih tawh a, a ngaihna pawh hre turah kan indah," a ti a; ZPM an sorkar chuan MINECO-ah Chief Minister's Office sawn luh an tum thu a sawi.

Dr Vanlalthlan chuan, "Ram hmasawnna innghahna bulpui ber chu sorkar inrêlbâwlna ṭha, good governance a ni. ZPM chuan kalphung thar, mipui sorkar hnuaiah sorkar chak leh huapzo siam kan tum a, tuna kan kal mek dan aia mumal leh awmze nei zawka kan kal a ngai," a ti a, ruahmanna fel tak an neih tawh thu a sawi.

ZPM a sorkar chuan hmasawnna a taka kalpui a nih theih nan sorkar department inhnaih zualte minister pakhat hnuaiah dah a ni dawn tih sawiin Vanlal­thlana chuan, "Department inhnaih zual (allied department)-te zir chian a, a theih anga pawh khawm dan kan zawn a ngai. Sorkar department 50 dáwn kan nei mek a, an inkarah thawhhona ṭha a awm theih nan leh awmze nei zawka hmalak nan convergence policy hman a ni ang," a ti.

Dr Vanlalthlana chuan, kalphung felfai leh inrêlbàwlna awmze neia kal chuan, tuna buaina tam tak chu tihreh theih a nih tur thu sawiin, "Eirukna theihna remchang tam tak tihbo a ni ang a, corruption hi nasa takin kan veng thei dawn a ni," a ti a, ZPM chu corruption do tura an inpeih thu a sawi.

ZPM MLA chuan, sorkar office-a thawkte tan leh dawrtu mipui tana a awlsam zawk nan sorkar pisa hrang hrangte hmun khata dah khawm (cluster approach management system) kalpui an tum thu sawiin, "Chutiang atan chuan sorkar hmun pawimawh dah khawmna MINECO kan nei sa a, hetah hian Chief Minister's Office pawh sawn luh a ni ang," a ti.