A thu azirin NDA kan thláwpin kan thláwp lo mai - Zoramthanga

MNF president Zoramthanga chuan nimin khan Mizo Hnam Rûna inkhawmah thu sawiin, National Democratic Alliance (NDA)-ah an tel dan chu issue base a ni a, a thu azirin an thláwpin an thláwp lo mai niin a sawi.

Zoramthanga chuan, MNF chu NDA-ah an tel avangin Lok Sabha-a no confidence motion-a an dinna mipuiin an ngaihtuah nasa tih sawiin, "MNF MP-te chêt dan chu kan hriat vek kha. Central-ah pawl lian tak pahnih UDA (Congress telna) leh NDA (BJP len berna) a awm a, keini chu Congress telnaa awm chi kan ni lo hrim hrim. NDA-a kan tel dan hi issue base-in kan tel mai a, an thu azirin kan thláwpin kan thláwp lo mai. MNF chu Pathian leh kan ram tan tia nghet taka thuthlung vuantu kan ni," a ti.

MNF President chuan, "CAB (Citizenship Amendment Bill) Mizoramah hman kan duh lo a, kan do a, kan hmang lo. UCC (Uniform Civil Code) pawh NDA chhawpchhuah ni mah se, kan vote pui lo. PM hnenah lehkhate ka thawn a, kan duh loh leh kan do dawn tih nasa takin ka hrilh mai a ni," a ti a; tun ṭuma no confidence motion chu Manipur buaina chungchang a nih avangin motion an thláwp tih a sawi.

No confidence motion thlawptir tuma Congress party mite CM banglaa luh an tum chungchangah Zoramthanga chuan, "Min tihtir an tum hma daih khan tih kan lo tum dîm diam daih tawh zawk. Information minister Pu Lalruatkima chu kan thil tum hrilh chiang turin ka hrilh. Congress unaute thangkam kha a per ṭhelh chiang hle a ni. An haw lam kha Bhavan-ah an inhmu khawm leh ngei ang a, hlawhtling inti tak maw?" a ti.

MNF President chuan, NDA-a an tel avangin a chhung aṭangin na takin an bauh ngam nia sawiin, "NDA kan tel avangin Pu Modi-a thu thua kal kan ni ve lo. A hma pawhin an duh loh em em Burma lama kan unau ráltlânte pawh an ei leh in, silh leh fên nen khawvel hriatah kan pek tur thu kan puang," a ti a; MNF anga huaisen taka Narendra Modi do ngam an awm loh thu a sawi.

Zoramthanga chuan, mi thar lawm luh tur an awm zel chu lawmawm a tih thu sawiin, "Pathian thil rel dan hi a mak a, a hun takah thil ṭha a la thleng zel dawn," a ti a; belhchian dâwl leh dâwl lo hruaitu chungchang chu mipuiin an hriat chian thu thu sawiin, "ZPM chuan enchhin turin kum tam tak mipuiah an inzuar tawh a, mipuiin an la enchhin miah lo," a ti bawk.

Nimina inkhawmah hian Zoramthanga'n MNF party zawm tharte a lawm lut a, an zingah ZPM PAC member ṭhin Zosangliana, Phairothanga leh adviser Lalmuankima te an tel.