NRHM Director hluiin thiam loh a chang

Aizawl District Court-a special judge (Prevention of Corruption Act) Dr HTC Lalrinchhana chuan, National Rural Health Mission (NRHM) mission director hlui Dr N Pallai chu eirûk thubuaiah nimin khan thiam loh a chantir.

PRISM president Vanlalruata leh PRISM general secretary RL Liantluanga ten January 13, 2010-a Anti Corruption Bureau (ACB)-a FIR an thehluh chu ACB chuan an chhui a; an thil hmuhchhuahte court-ah an thehlut a, hun eng emaw chen ngaihtuah a nih hnuah court chuan Dr Pallai chu thiam loh a chantir a ni.

Court thuremnaa a lan danin, Dr N Pallai hian a tak taka huaihawt si loin ṭum li lai zirhona (workshop) a buatsaih a, chu'ngah chuan Rs 4,19,360 eirûah puh a ni. Health sub centre 10 siamna Rs 35,40,000 eiruah leh PHC thawm ṭhatna sum Rs 9,50,000 eiruah puh a ni bawk. Heng puhna chi li-ah hian thiam loh chantir a ni.

Special Judge chuan Dr N Pallai hi eirûk thubuai dangah May 12, 2023 khan thiam loh a lo chantir tawh a, chumi ṭum chuan kum 4 chhung jail-a táng tur leh Rs 24,00,000 chawi turin a hrem. Mahse, Dr Pallai hi bail-in a chhuak mek thung.

Thubuai dangah thiam loh chantir a nih leh tâk avangin Court chuan Dr N Pallai-a bail a nihna hi titawp nghalin, jail-a dah luh turin a ti a; nimina thiam loh chantirnaa hrem a nih dan tur chu August 14, 2023-ah puan a ni ang.