SDGs kalpui ṭha lawmman hlan a ni

Planning & Programme Implementation department chuan nimin khan Dawrpui Multipurpose Hall-ah Sustainable Development Goals Local/Grassroot Index Ranking Award hlanna hun an buatsaih a, chief secretary Dr Renu Sharma-i'n hmanpuiin, SDG Report a tlangzarh.

Inkhawmah hian Localization of Sustainable Development Goals Pilot Project - khawpui leh thingtlanga kalpui tawhnaa ti ṭhate hnenah lawmman hlan a ni a; khawpui (Urban Indicator Framework)-ah Chanmari West pakhatna a ni a, thingtlang (Village Indicator Framework)-ah Thingsul Tlangnuam, Aizawl district pakhatna a ni thung a, lawmman Rs 10,00,000 ve ve an dawng.

SDGs 20 Point Programme hnuaiah khaw tinte chu thing ṭiak 4,770 phun tura beisei an ni a; Mizoramah Pàwlráng khua chu thing phun tura beisei zat tihlawhtling awm chhun niin, January 1, 2022 aṭanga February 15, 2023 inkar khan thing 5,000 an phun. Pawlrang hnenah hian Special Award pek a ni a, khawtlang hmasawnna ruhrel siamna tur Project Incentive Award Rs 2,00,000 hlan an ni.

SDG kalpui tur hian financial year 2022-23 atan Mizorama khua (pillot village) 62 thlan a ni a, AMC ward 19-te aṭangin pilot locality (veng) pakhat ṭheuh thlan a ni bawk.

Chief secretary Dr Renu Sharma chuan, tun hnaia NITI Aayog-in SDGs kalpui ṭha a tihchhuah, SDG India Index-ah Mizoram chu state hmasawn berah thlan a nih thu a sawi a, "India ram pumah 12-na kan ni thei hi a lawmawm a, khawtlang huapa thawhhona ṭha tak awmna Mizoramah SDGs thil tumte hlawhtling taka kalpui a nih ngei ka beisei," a ti.