Politics-a kohhran leh NGO-te kaih luh tumah BJP President-in Congress a puh

BJP, Mizoram Pradesh president Vanlalhmuaka chuan nimin khan an party pisaa inkhawmah thu sawiin, kohhran leh tlawmngai pawlte politics-a kaih luh tumah Congress party a puh a, Congress party ze ṭha lo tihlanna a nih thu a sawi.

Vanlalhmuaka chuan, "Tun hnaia Pu Lalsawta, MPCC president-in BJP sorkar paih thla tura political party zawng zawng intêlkhawm tura a sàwm bakah, BJP thlipui do lêt turin political party mai ni loa kohhran leh tlawmngai pawl zawng zawng a sáwm hi party thi tur chalchàng au aw a ni," a ti.

Lalsawta'n India ram bakah, a bikin Mizoramin hma hun thim leh khirh tak a tawng mek nia a sawi chu mipui hruai kâwi tumna a nia sawiin Vanlalhmuaka chuan, "Mizorama hun thim leh khirh kum 20 chuang thlentirtu chu Congress, Pi Indira Gandhi kaihhruai a ni a, Mizoramin hun thim leh khirh kan hmabak mek a nih chuan Mizoram min kaihhruai tawhtu INC leh tuna sorkarna chelh mektute vang a ni," a ti a; Congress party chu India rama sakhaw inlehna dan siam tawhtu an nih thu leh bawng talh khapna dan state 22-a siamtu an nih thu a sawi.

BJP President chuan, "Manipur buaina hi sakhua leh sakhua buaina a ni lo; chi leh chi, hnam leh hnam buaina a ni," a ti bawk.