MNF kan sorkar leh ngei ang - Zorama

MNF president Zoramthanga chuan, inthlanpui awm turah Congress party-in MLA seat pahnih an lak chuan an vannei dawn a, ZPM-in sorkarna chance an nei lo bawk nia sawiin, MNF an sorkar leh ngei dawn niin a sawi.

Nimina Chanmari YMA Hall-a MNF Aizawl North-III Block Conference a hmanpuinaah thu sawiin Zoramthanga chuan MNF party-in hma an sawn zel niin a sawi a, "Pathian leh mipui zarah sorkarna kan chang leh ngeiin ka ring tlat a ni. Kumin 2023 inthlanah pawh he lai bialah leh ram pumah kan tling leh ngei ang," a ti.

Zoramthanga chuan, ZPM chu sorkarna siam mai tur angin an thaw nia sawiin, "ZPM-in sorkarna siam turin chance an nei lo. Khawthlang leh chhim lam ramri hrûla bial 10-ah hian seat an lâk a rinawm lo a, bial 30 dang la awmah 21 an lâk theih a rinawm loh hrim hrim," a ti a; Aizawlah pawh an tlahniam sâwt hle niin a sawi.

MNF President chuan, "Congress tlin theihna tura inrin khawi lai nge, tiin zawt kual ila, seat pahnih an lâk chuan an vannei khawp ang," a ti bawk.

Inkhawmah hian MNF zawm thar mi 299 an lawm lut niin MNF thuchhuah chuan a tarlang.