END-in hmun paliah heroin an man

Excise & Narcotics Department (END) leh an thawhpuite chuan August 10-11 chhung khan heroin kg. 3.161 (hawng 256) an man a; ruihhlo khuahkhirhna dan a khauh avangin dan bawhchhe lo turin mi tin an ngen.

END leh CADS thawk dun chuan nimin zing (Ningani zan) dar 1 khan Bawngkawn Brigade Vengah heroin gram 109 (hawng 8) leh a neitua puh Zosangpuii (51) d/o Thantluanga (L), Bawngkawn Brigade nia inchhál an man a, ruihhlo phurhna Maruti Eeco van MZ01 K-3727 an hrêng nghal.

Nimin (Ningani zan) vêk dar 1:30 khan END chuan Keifang dái, Champhai kawngah Bolero AS-11 EC-5417 leh Swift car AS-11 Z-4750 aṭangin heroin kg. 1.314 (hawng 105) an man a; a neitu nia puh mi panga - Monir Uddin (30), Pakuwapunji Bhaibonti, Hailakandi, Golam Wazid Bhaubhuiya (38) leh Mayazul Hoque Bharbhuiya (37) Ramnagar, Assam ve ve leh, Barhan Uddin Tapahar (43) leh Salman Uddin Laskar (23), Dholai, Assam ve vete an man bawk.

END hian August 10, Ningani chhun dar 12 khan Falkland Vengah heroin gram 258 (hawng 22) leh a neitua puh Lalthantluang (30) s/o Thangluai, Khawmawi, Myanmar leh Vanlalsawma (24) s/o Vanlalpana, Champhai Zotlang nia inchhálte an man.

August 10 chawhnu dar 1:30 khan Tuikhurhlu (Edenthar Veng)-ah Santro car MZ-01 V-0693 aṭangin heroin kg. 1.480 (hawng 121) leh a neitua puh - Niengboi (33), New Lamka, Churachandpur, Thlingneihhat (33), Lamka Manipur (Manipur buai vanga raltlana Tuikhurhlua khawsa mek) leh, Zoramnghak (47), Tuikhurhlu (Edenthar) nia inchhálte an man bawk.

Heroin vanga mante lakah hian Narcotics Drugs & Psychotropic Substances Act, 1985 tlawhchhanin thubuai ziah luh a ni.