Zirtirtu mi 2,700 vel lâk a ni tawh

School Education minister Lalchhandama Ralte chuan, Mizoramah zirtirtu post ruak 3,000 chuang a awm a, zirtirtu a nghet leh nghet loin mi 2,700 vel lak a ni tawh tih a sawi a, "Mizoram sorkarin zirna a ngai pawimawh a, a arkhawthimdai lo a, awmze nei takin a kalpui," a ti.

Ngopa Sub-Divisional Education Officer (SDEO) pisa nimina a hawnnaah Minister chuan, MNF sorkarin zirtirtu a lakte chu a tling leh tlak (qualified trained) vek an nih thu a sawi a, "Mizorama zirna syllabus pawh hmun dang nena khaikhinin a hniam chuang lo," tiin, all India standard a nih thu leh zirtirtute pawh training pek ṭhin an nih thu a sawi.

Bialtu MLA L Thangmawia pawhin thu sawiin, sorkar term kal laiah zirtirtu pension 950 chuang leh headmaster-a kaisang 540 an awm tawh thu a sawi a, "Department enkawl hautak ber a ni nã a, hmasawnna hmuh tur tam tak a awm hi a lawmawm hle a ni," a ti.

School Education Minister hian nimin vêk khan Saitual Higher Secondary School-a commerce leh science zirna tur building sak thar leh Netaji Subhas Chandra Bose Avasiya Vidyalaya hmeichhe hostel, zirlai 30 awm theihna a hawng bawk.