Zangnadawmna dawng tawhte An in ṭhiah nan ni 10 hun pe

National Highway no. 54 zauh a nih dawn vanga Serchhip district-a in ṭhiah ngai, zangnadawmna pek tawh chhungkaw 165-te chu ni 10 chhungin an in ṭhiat tura hriattir an ni.

Serchhip district-a thuneitute chuan tun hnai khan zangnadawmna dawng tawh, an in la ṭhiat lote chu khaw hrang hrangah an endik a, in la ṭhiat lo chhungkaw 165 an hmu chhuak. Zangnadawmna an dawn kim tawh avangin ni 10 chhunga an in ṭhiat ngei turin an hriattir nghal.

Serchhip Bawrhsap hoa August 10, Ningania thuneitute ṭhukhawm chuan, chhungkaw 165-te'n an in an ṭhiah leh ṭhiah loh ni 10 hnuah enfiah leh an rêl a ni.

In la ṭhiat lote chu Serchhipah chhungkaw pakhat, Keiṭumah chhungkaw 29, Chhiah­tlangah chhungkaw 30, Chhiahtlang by-pass road-ah chhungkaw panga, Chhingchhipah chhungkaw 59, Baktawngah chhungkaw pali leh Khumtungah chhungkaw pali an awm a ni.