KHAWTHLIR

Thisen pe

Pentecostal Youth Department (NEI), Lunglei district chuan nimin khan Lunglei Civil Hospital blood bank-ah thisen unit 17 an pe a, petute mipa 15 leh hmeichhia pahnih an ni. Serchhip Auto Rickshaw Owners Association pawhin kum 25 an tlin pualin Serchhip District Hospital tan thisen unit 16 an pe bawk.

Heroin man

Mizoram Police-a Special Narcotic PS leh Assam Rifles ṭangho chuan August 10, Ningani khan Hlimen, Aizawlah heroin gram 256 leh a neitua puh Vanzalala (35) leh Lalthanmawii (42), Myanmar-a Chhipchang khua ve ve nia inchhálte an man a; Special Narcotic PS-ah thubuai ziah luh a ni.

MLA-in tanpui

Hachhek bialtu MLA Lalrindika Ralte chuan tun kar chhung khan dàn loa kuhva tawlhtute danna tura Tuidam leh Kawrtethawveng inkara check gate siamna atan Rs 1,00,000 a hlân. Kawrthah South VO Self Help Group hnenah puantah khawl leina leh Kanhmun MUP Rûn sak nan Rs 1,00,000 ve ve, Zawlnuam damdawi-in hnenah generator leh Tuidam MZI hnenah ṭingṭang a pe bawk.

Motion thláwp

August 10, Ningania Lok Sabha session-ah prime minister Narendra Modi kaihhruai NDA sorkar rin tâwk lohna, no confidence motion chu Mizoram Lok Sabha MP C Lalrosanga'n a thláwp. No confidence motion hmáwrbâwk hmain eptu member-te House aṭangin an chhuak a, Speaker-in voice vote a laknaah C Lalrosanga hian motion a thláwp a ni.

ZPM VC ding

Lengteng biala Hriang­hmun khuaa MNF leh Congress party aṭanga VC member-te'n ZPM an zawm avangin ZPM kaihhruai VC a ding. VC member-te chu Lengteng biala ZPM candidate tura ruat F Rodingliana'n August 10, Ningani khan ZPM party-ah a lawm lut.

Khawivah chanchin

Malsawmtluanga ziah, 'Khawivah chanchin leh a khâwi dan' tih lehkhabu chu nimin khan minister Dr R Lalthangliana'n a pisaah a tlangzarh. Lehkhabu hi Rs 200 man a ni.

Mamitah Y20 Meet

Sports & Youth Services department leh MZP chuan nimin khan Mamit College seminar hall-ah Youth-20 Meet on Nationalism, Patriotism & Development an buatsaih a, bialtu MLA H Lalzirliana khuallian a ni. Khuallianin thu a sawi bakah, resource person-te'n ram leh hnam hmangaihna leh hmasawnna chungchang an sawi.

Kawng thar hawng

MLA fund aṭanga sum hmuh hmanga Mualpuia Siby futsal ground bula kawng siam chu bialtu MLA Lalchhuanthanga’n nimin khan a hawng. Kawng siamna atan hian MLA fund Rs 3,00,000 hman a ni. MLA chuan, "Corruption ka ti ve dawn lo a, ka fihlim dawn tih hi ka puang nawn a ni," a ti.

Zirna zirho

Kulikawn Primary School, Kulikawn Middle School leh Kulikawn High School-te chuan nimin khan seminar an buatsaih a, Mizoram University-a professor Lalbiakdiki Hnamte-in a hmanpui. Seminar thupui chu 'Issues and concerns in education with special reference to government Kulikawn schools' tih a ni a; sorkar sikulte ṭan lak dan tur te, insiamṭhat ngaihna lai te, sorkar sikula zirlai an luh tam theih dan turte zirho a ni.

SVEEP training

Aizawl District SVEEP Nodal Officers Conference on SVEEP Preparedness chu nimin khan Administrative Training Institute auditorium-ah khâr a ni. Khàrna inkhawm hi Election Commission of India secretary Santosh Kumar, SVEEP coordinator RK Singh, assistant section officer Shiv Kumar leh graphic designer Esha Khan ten an hmanpui.